മുംബൈ: മദ്യക്കുപ്പിയുമായി രണ്ടു യുവാക്കള്‍ 2,000 അടി താഴ്ചയിലേക്ക് വീഴുന്ന വിഡിയോ സാമൂഹിക മാധ്യമങ്ങളില്‍ വൈറലാവുന്നു. മഹാരാഷ്ട്രയിലെ സിന്ദു ബര്‍ഗ് ജില്ലയിലെ അംമ്പോളി പര്‍വതത്തില്‍ നിന്നാണ് രണ്ട് യുവാക്കള്‍ മദ്യക്കുപ്പിയും പിടിച്ച് കൊക്കയിലേക്ക് വീണത്. ഇവര്‍ക്കായുള്ള തിരച്ചില്‍ തുടര്‍ന്നുകൊണ്ടിരിക്കുകയാണ്.
ഈ മാസം ഒന്നിന് അംമ്പോളി പര്‍വതത്തിലെ കവലസാഡ് പോയിന്റിലാണ് അപകടമുണ്ടായതെന്ന് സവാന്ത്വഡി സ്റ്റേഷനിലെ സീനിയര്‍ പൊലിസ് ഇന്‍സ്‌പെക്ടര്‍ സുനില്‍ ദനാവഡെ പറഞ്ഞു.
ഇമ്രാന്‍ ഖാന്‍(26), പ്രതാപ് റത്തൗഡ്(21) എന്നിവരാണ് താഴ്ചയിലേക്ക് വീണത്. വിനോദ സഞ്ചാരത്തിനായി എത്തിയ ഏഴംഗ സംഘത്തിലുള്ളവരാണ് അപകടത്തില്‍പ്പെട്ടതെന്ന് സുനില്‍ ദനാവഡെ പറഞ്ഞു. കോലാപ്പൂരിലെ കോഴിഫാമില്‍ ജോലി ചെയ്യുന്നവരാണിവര്‍. മൃതദേഹം വീണ്ടെടുക്കാനുള്ള ശ്രമങ്ങള്‍ പൊലിസ് നടത്തുന്നുണ്ടെങ്കിലും കനത്തമഴ ഇതിന് തടസമായിരിക്കുകയാണ്.
സാമൂഹിക മാധ്യമങ്ങളില്‍ വ്യാപകമായി പ്രചരിച്ച വിഡിയോയില്‍ മദ്യക്കുപ്പികളുമായി കൊക്കയുടെ മുകളില്‍ കെട്ടിയിരിക്കുന്ന കൈവരിയില്‍ കയറുന്നതിനിടെ താഴെ വീഴുന്നത് കാണാം.