പയ്യന്നൂര്‍: വീട്ടമ്മയുടെ മാല മോഷ്ടിച്ച യുവാവിനെ നാട്ടുകാര്‍ കൈയോടെ പിടികൂടി. സുരഭി നഗറിലെ വീട്ടിലാണ് മോഷണം നടന്നത്. ഇന്നലെ പുലര്‍ച്ചെ ഒന്നരയോടെയായിരുന്നു സംഭവം. ജനല്‍ പൊളിച്ച് അകത്തുകയറിയ മോഷ്ടാവ് മുറിയില്‍ ഉറങ്ങിക്കിടക്കുകയായിരുന്ന എ. രാധയുടെ ഒന്നരപവന്‍ തൂക്കം വരുന്ന സ്വര്‍ണമാലയാണ് മോഷ്ടിച്ചത്. മാല പൊട്ടിക്കുമ്പോള്‍ ഞെട്ടിയുണര്‍ന്ന രാധ ബഹളംവയ്ക്കുകയും ശബ്ദംകേട്ടെത്തിയ വീട്ടുകാരും നാട്ടുകാരും ചേര്‍ന്നു നടത്തിയ തെരച്ചിലില്‍ വീടിന്റെ സമീപത്തുനിന്നു മോഷ്ടാവിനെ പിടികൂടുകയുമായിരുന്നു.
മാല പൊട്ടിച്ചോടിയ കാങ്കോല്‍ പാപ്പാരട്ടയിലെ വെന്നില ഹൗസിലെ ഇ. കൃഷ്ണനെ (40) നാട്ടുകാര്‍ പൊലിസിലേല്‍പ്പിച്ചു. അന്വേഷണത്തില്‍ ഇയാളില്‍ നിന്നു മാല കണ്ടെടുത്തു. പയ്യന്നൂരില്‍ നടന്ന മറ്റ് മോഷണക്കേസുകളില്‍ പ്രതിക്കു പങ്കുണ്ടോയെന്നുള്ള അന്വേഷണത്തിലാണു പൊലിസ്. പ്രതിയെ ഇന്നു കോടതിയില്‍ ഹാജരാക്കും.