പാലക്കാട് : കംപ്യൂട്ടര്‍, ഇന്റര്‍നെറ്റ് സൗകര്യങ്ങള്‍ പ്രയോജനപ്പെടുത്തി കാര്‍ഷികരംഗം മെച്ചപ്പെടുത്തുക എന്ന ലക്ഷ്യത്തോടെ ജില്ലയിലെ വിവിധ ബ്ലോക്കുകളില്‍ നിന്നും തിരഞ്ഞെടുത്ത മുപ്പത് കര്‍ഷകര്‍ക്കായി കംപ്യൂട്ടര്‍ പരിശീലനം നല്‍കി. മലമ്പുഴ പ്രാദേശിക കാര്‍ഷിക വിജ്ഞാന പരിശീലനകേന്ദ്രത്തിലാണ് പരിശീലനം നടന്നത്. കമ്പ്യൂട്ടറിന്റെ അടിസ്ഥാന വിവരം മുതല്‍ കാര്‍ഷിക മേഖലയിലെ പുതിയ വെബ്‌സൈറ്റുകളും പോര്‍ട്ടലുകളും ഓണ്‍ലൈന്‍ സംബന്ധിച്ച വിവരങ്ങളും പരിശീലന പരിപാടിയില്‍ കര്‍ഷകര്‍ക്ക് പകര്‍ന്നു കിട്ടി. പഠിതാക്കളുടെ ഇ.മെയില്‍ ശേഖരിച്ച് കൂട്ടായ്മയും രൂപപ്പെടുത്തിയിട്ടുണ്ട്. ഓണ്‍ലൈന്‍ കാര്‍ഷിക വിപണി, കാലാവസ്ഥ, വില പ്രവചനം, രോഗകീട മുന്നറിയിപ്പ്, വളപ്രയോഗം തുടങ്ങി കാര്‍ഷിക മേഖലയുമായി ബന്ധപ്പെട്ട എല്ലാ കാര്യങ്ങളും പരിശീലനത്തിലൂടെ കര്‍ഷകര്‍ക്ക് പകര്‍ന്ന് കിട്ടി. കാര്‍ഷിക സര്‍വ്വകലാശാലയിലെ ഐ.ടി വിദഗ്ദരായ ഡോ.സക്കീര്‍ ഹുസൈന്‍, ഡോ.അഹമ്മദ് എന്നിവര്‍ പരിശീലനത്തിന് നേതൃത്വം നല്‍കി. സമാപന പരിപാടി കൃഷി ഡപ്യൂട്ടി ഡയറക്ടര്‍ ടി. ഗിരിജ ഉദ്ഘാടനം ചെയ്തു. കൃഷി അസി.ഡയറക്ടര്‍ വി.സുരേഷ് കുമാര്‍ പ്രസംഗിച്ചു.