നെടുമങ്ങാട്: തകര്‍ന്ന് വീഴാറായ മണ്‍ചുവരുകള്‍ക്കു മുകളില്‍ കീറിപ്പറിഞ്ഞ ഷീറ്റ് വലിച്ചു കെട്ടി നിത്യ ജീവിതം കഴിച്ചുകൂട്ടുകയാണ് ഇവര്‍.
തൊളിക്കോട് ചെട്ടിയാംപാറ കിളിയന്നൂര്‍ വര്‍ഷഭവനില്‍ രാധ(47)യും രണ്ട് മക്കളുമടങ്ങുന്ന  കുടുംബത്തിന്  ഭീതിയൊഴിഞ്ഞ നേരമില്ല.മേല്‍ക്കൂരയിലെ തടികള്‍ ദ്രവിച്ച് നിലംപൊത്താറായി. ഭര്‍ത്താവ് വീട് ഉപേക്ഷിച്ച് പോയിട്ട് വര്‍ഷങ്ങളായി. മകന്‍ ഷൈന്‍ കഴിഞ്ഞ വര്‍ഷം പ്ലസ്ടു കഴിഞ്ഞു. മകള്‍ ശാലു ഇപ്പോള്‍ പ്ലസ്ടുവില്‍.  സ്വസ്ഥമായിരുന്ന് പഠിക്കാന്‍ പോയിട്ട് സുരക്ഷിത ബോധത്തോടെ ഉറങ്ങാനുള്ള സാഹചര്യം പോലും വീട്ടിലില്ല.
അടുത്ത വീട്ടിലെ കിണറാണ് കുടിവെള്ളത്തിനുള്ള ആശ്രയം. മുന്‍പ് സമീപത്തെ തോടായിരുന്നു വെള്ളത്തിനായി ആശ്രയിച്ചിരുന്നത്. ആരോഗ്യപ്രശ്‌നങ്ങളുണ്ടായപ്പോള്‍  അടുത്തവീട്ടുകാരുടെ സഹായം തേടി.  ആദ്യം തൊഴിലുറപ്പ് പണിക്കു പോയി നിത്യവൃത്തിക്കു വഴി കണ്ടെത്തിയിരുന്ന രാധക്കു പിന്നീട് തലച്ചോറിനുണ്ടായ  രോഗബാധയെ തുടര്‍ന്ന്  അതില്‍ പോകാനായില്ല. അതോടെ ജീവിതം പ്രതിസന്ധിയിലായി.പട്ടിണിയിലേക്കെത്തിയപ്പോള്‍ കടംവാങ്ങിയും വായ്പയെടുത്തും തുണികള്‍ വാങ്ങി വീടുകളില്‍ എത്തിച്ച് തവണ വ്യവസ്ഥകളില്‍ വില്‍പന നടത്തി. എന്നാല്‍ പലരും ക്യത്യമായി പണം തിരിച്ചടയ്ക്കാതെ വന്നതോടെ അതും നഷ്ടത്തിലായി. ഇതിനായി സഹകരണബാങ്കില്‍ നിന്നെടുത്ത വായ്പ തിരിച്ചടയ്ക്കാനും കഴിയാതായി. ഇപ്പോള്‍ നിയമനടപടികള്‍ സ്വീകരിക്കുമെന്ന ബാങ്ക് നോട്ടീസ് ലഭിച്ചിരിക്കുകയാണ്. നിലവില്‍ ദൈനംദിന ചിലവുകള്‍ പോലും വഹിക്കാനാകാത്ത സ്ഥിതിയിലാണ് ഈ കുടുംബം. ഒരു നേരത്തെ ആഹാരത്തിനു പോലും വഴിയില്ലെങ്കിലും രാധയുടെ പേരിലുള്ള റേഷന്‍കാര്‍ഡ് എ.പി.എല്ലാണ്. മകളുടെ പഠിത്തവും പ്രതിസന്ധിയിലായി.
വീടിന്റെ പിന്‍വാതില്‍ വല്ലവിധേനയും കെട്ടിവച്ചാണ് അന്തിയുറക്കം. ചിലപ്പോഴൊക്കെ ഉണര്‍ന്നിരുന്നു നേരംവെളുപ്പിക്കേണ്ട ഗതികേടുമുണ്ടായി.തുച്ഛമായ തുക ചികിത്സാ സഹായമായി ലഭിച്ചതൊഴിച്ചാല്‍ മറ്റ് ആനൂകൂല്യങ്ങളൊന്നും ഇവര്‍ക്ക്  ഇതുവരെ ലഭിച്ചിട്ടില്ല.  ദയനീയ സ്ഥിതി കണ്ട് നാട്ടുകാര്‍ കസേരയും കട്ടിലിലും സൗജന്യമായി നല്‍കി. ശക്തമായ ഒരു മഴയോ കാറ്റോ വന്നാല്‍ ഈ കുടില്‍ നിലംപൊത്തുമെന്ന് ഉറപ്പാണ്.
സുരക്ഷിതമായി താമസിക്കാനാവുക എന്നതാണ് ഈ കുടുംബത്തിന്റെ ഏറ്റവും വലിയ സ്വപ്നം. കാനറാ ബാങ്കിന്റെ പറണ്ടോട് ശാഖയില്‍ 1466101033330 എന്ന നമ്പരില്‍ രാധയുടെ പേരില്‍ അക്കൗണ്ട് ആരംഭിച്ചിട്ടുണ്ട്.