ചെര്‍ക്കള: രാപ്പകല്‍ വ്യത്യാസമില്ലാതെ നൂറുകണക്കിനു വാഹനങ്ങള്‍ പോകുന്ന ദേശീയ പാതയുടെ ഇരുവശവുമുള്ള കാടുകള്‍ വാഹനയാത്രക്കാര്‍ക്കു ഭീഷണിയാവുന്നു. ചെര്‍ക്കള മുതല്‍ ചട്ടഞ്ചാല്‍ വരെയുള്ള ദേശീയ പാതക്കരികിലാണു കാടു പടര്‍ന്നു കിടക്കുന്നത്. കൊടും വളവുകളും കുത്തനെയുള്ള ഇറക്കങ്ങളും ഒരു വശം വന്‍ കുഴികളുമുള്ള പാതയോരത്തെ സുരക്ഷാ സംവിധാനങ്ങളും അപായ മുന്നറിയിപ്പു ബോര്‍ഡുകളും കാടു മൂടി കാണാന്‍ പറ്റാത്ത അവസ്ഥയാണുള്ളത്. രാത്രികാലങ്ങളില്‍ ദൂര സ്ഥലങ്ങളില്‍ നിന്നു വരുന്ന വാഹനങ്ങളാണ് ഏറെ ദുരിതമനുഭവിക്കുന്നത്. വാഹനാപകടങ്ങള്‍ തടയാന്‍ സ്ഥാപിച്ച സുരക്ഷാ ഭിത്തികള്‍ പല ഭാഗത്തും തകര്‍ന്നു കിടക്കുകയാണ്.