തലക്കുളത്തൂര്‍: ഗ്രാമ പഞ്ചായത്തും കൃഷിഭവനും ചേര്‍ന്ന് ആവിഷ്‌കരിച്ച 'പാക്കവയലില്‍ പന്തീരായിരം പറനെല്ല്' പദ്ധതിയുടെ ഭാഗമായി അന്നശ്ശേരി പാക്കവയലിലെ 100 ഏക്കര്‍ പാഴ്‌നിലത്ത് വിത്തിറക്കി. മന്ത്രി എ.കെ ശശീന്ദ്രന്‍ നെല്‍വിത്തിടല്‍ കര്‍മം നിര്‍വഹിച്ചു. ഹരിത കേരളം പദ്ധതിയുടെ ഭാഗമായി രണ്ടുലക്ഷം ഹെക്ടര്‍ സ്ഥലത്ത് നെല്‍കൃഷി ആരംഭിക്കുകയാണു സര്‍ക്കാര്‍ ലക്ഷ്യം വയ്ക്കുന്നതെന്ന് മന്ത്രി അഭിപ്രായപ്പെട്ടു.
വെള്ളക്കെട്ട് കാരണം കൃഷി ചെയ്യാതെ 35 വര്‍ഷമായി കിടന്നിരുന്ന സ്ഥലത്താണു വിത്തിടല്‍ നടന്നത്. അന്നശ്ശേരി തോടിന്റെ പ്രവൃത്തി ഒരുഘട്ടം പൂര്‍ത്തിയായതോടു കൂടിയാണ് പാക്കവയല്‍ കൃഷിക്ക് അനുയോജ്യമായി തീര്‍ന്നത്.
കൃഷിവകുപ്പ്, ഹരിതമിഷന്‍, ആത്മ, തൊഴിലുറപ്പു പദ്ധതി, കര്‍ഷക പങ്കാളിത്തം എന്നിവയിലൂടെയാണ് കര്‍ഷകര്‍ സാമ്പത്തികസഹായം കണ്ടെത്തിയത്.
250 മെട്രിക് ടണ്‍ വിളവ് അധികമായി ഉല്‍പാദിപ്പിക്കാന്‍ സാധിക്കുമെന്നാണ് പ്രതീക്ഷിക്കുന്നത്. ഏകദേശം 100 കര്‍ഷകര്‍ക്ക് ഇതിന്റെ ഗുണം ലഭിക്കും. ചേളന്നൂര്‍ ബ്ലോക്ക് പഞ്ചായത്ത് പ്രസിഡന്റ് ഒ.പി ശോഭന അധ്യക്ഷയായി.
പ്രിന്‍സിപ്പല്‍ കൃഷി ഓഫിസര്‍ ഇന്‍ ചാര്‍ജ് ടി. പുഷ്‌കരന്‍ പദ്ധതി വിശദീകരിച്ചു. കെ.ടി പ്രമീള, സീന സുരേഷ്, കെ. പ്രകാശന്‍, ഇ.ടി മനോഹരന്‍ പങ്കെടുത്തു.