ചെറുവത്തൂര്‍: സ്വാതന്ത്ര്യദിനാഘോഷത്തിനു നാടൊരുങ്ങുമ്പോള്‍ കുട്ടമത്തെ കുട്ടികള്‍ സ്വാതന്ത്ര്യസമര ചരിത്രം നാടകത്തിലൂടെ പറയും. ആസാദി ദുനിയ എന്ന നാടകവുമായാണ് കുട്ടമത്ത് ഗവ.ഹയര്‍സെക്കന്‍ഡറി സ്‌കൂളിലെ വിദ്യാര്‍ഥികള്‍ എത്തുക.
സ്വാതന്ത്ര്യ സമരവുമായി ബന്ധപ്പെട്ട വിഷയങ്ങളാണ് അരങ്ങിലെത്തുക. ജില്ലയിലെ വിവിധ വിദ്യാലയങ്ങളില്‍ ഈ നാടകം അവതരിപ്പിക്കും. സ്വാതന്ത്ര്യസമര പോരാട്ടങ്ങള്‍ കേട്ടുകേള്‍വി മാത്രമല്ല അനുഭവ തീഷ്ണതയുടെ പോരാട്ടങ്ങള്‍ കൂടിയാണെന്നും സ്വാതന്ത്ര്യം സംരക്ഷിച്ച് നിര്‍ത്താന്‍ നാം പ്രതിജ്ഞാബദ്ധരാണെന്നും നാടകം ഓര്‍മിപ്പിക്കുന്നു. ആഗസ്റ്റ് 11മുതല്‍ നാടകയാത്ര ആരംഭിക്കും. രാവിലെ 9.30ന് പഞ്ചായത്ത് പ്രസിഡന്റ് മാധവന്‍ മണിയറ യാത്ര ഉദ്ഘാടനം ചെയ്യും.