താമരശ്ശേരി: സ്‌കൂട്ടറില്‍ മദ്യവില്‍പന നടത്തുകയായിരുന്ന ഉണ്ണികുളം എം.എം പറമ്പ് ചെറുതൊടി അഷ്‌റഫി (37) നെ താമരശ്ശേരി എക്‌സൈസ് റെയ്ഞ്ച് പ്രിവന്റിവ് ഓഫിസര്‍ ചന്ദ്രന്‍ കുഴിച്ചാലിലും സംഘവും അറസ്റ്റ് ചെയ്തു.
ഇയാളില്‍നിന്നു 19 കുപ്പി മദ്യവും പിടികൂടിയിട്ടുണ്ട്. സ്‌കൂട്ടറില്‍ മദ്യവും പാന്‍മസാലകളും വില്‍പന നടത്തുന്നുവെന്ന രഹസ്യവിവരത്തെ തുടര്‍ന്ന് നടത്തിയ അന്വേഷണത്തിലാണ് പ്രതി പിടിയിലായത്. മദ്യം കടത്തുന്നതിനായി ഉപയോഗിച്ച സ്‌കൂട്ടറും പിടിച്ചെടുത്തിട്ടുണ്ട്. പേരാമ്പ്ര കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു. ക്രിസ്മസ്-പുതുവത്സരാഘോഷങ്ങളോട് അനുബന്ധിച്ചുള്ള പ്രത്യേക പരിശോധനകള്‍ തുടരുമെന്ന് താമരശ്ശേരി എക്‌സൈസ് ഇന്‍സ്‌പെക്ടര്‍ പി.പി വേണു അറിയിച്ചു.
റെയ്ഡില്‍ സിവില്‍ എക്‌സൈസ് ഓഫിസര്‍ സി.ജി സുരേഷ് ബാബു, എ.സി മുഹമ്മദ് ഇര്‍ഷാദ്, വനിതാ സിവില്‍ എക്‌സൈസ് ഓഫിസര്‍ കെ.എസ് ലതാ മോള്‍, ഡ്രൈവര്‍ കൃഷ്ണന്‍ എന്നിവര്‍ പങ്കെടുത്തു.