കക്കട്ടില്‍: ആര്‍.എസ്.എസ് പ്രവര്‍ത്തകന്‍ പൊയ്കയില്‍ ശ്രീജുവിനെ വെട്ടിക്കൊലപ്പെടുത്താന്‍ ശ്രമിച്ച കേസില്‍ നാലു സി.പി.എം പ്രവര്‍ത്തകരെ കുറ്റ്യാടി സി.ഐ ഇ. സുനില്‍ കുമാര്‍ അറസ്റ്റ് ചെയ്തു. കക്കട്ടില്‍ അയനിക്കുന്നുമ്മല്‍ അജീഷ് (36), കുറ്റ്യാടി ഊരത്ത് അമ്പലക്കണ്ടി രാജേഷ് (29), കക്കട്ടില്‍ മൊയിലോത്ത് ഷൈജു (39), കക്കട്ടില്‍ മീത്തലേ കൊയിറ്റിക്കണ്ടി എം.കെ സുനിഷ് (36) എന്നിവരെയാണ് പാതിരിപ്പറ്റ ക്വാറിക്കടുത്തുവച്ച് അറസ്റ്റ് ചെയ്തത്. ഇവരെ നാദാപുരം കോടതിയില്‍ ഹാജരാക്കി.
ഇവര്‍ സഞ്ചരിച്ച ഐ ടെന്‍ കാറും ഒളിപ്പിച്ച ആയുധങ്ങളും കണ്ടെടുത്തിട്ടുണ്ട്. പ്രതികള്‍ ആക്രമിക്കാന്‍ ഉപയോഗിച്ചിരുന്ന ആയുധങ്ങള്‍ കക്കട്ടിലില്‍ നിന്ന് നേരത്തെ കണ്ടെടുത്തിയിരുന്നു. കടിയങ്ങാട്ടു വച്ചാണ് കാര്‍ കസ്റ്റഡിയിലെടുത്തത്. തിരുവനന്തപുരം സ്വദേശിയുടെ ഉടമസ്ഥതയിലുള്ളതാണ് കാര്‍.
ശനിയാഴ്ച ഉച്ചയ്ക്ക് ഒന്നോടെ അമ്പലകുളങ്ങര ടൗണില്‍ നിട്ടൂര്‍ റോഡില്‍ വച്ചാണ് ശ്രീജുവിനു വെട്ടേറ്റത്. കഴിഞ്ഞമാസം 17നു നടന്ന ഹര്‍ത്താലില്‍ സി.പി.എം ജില്ലാ സെക്രട്ടറി പി. മോഹനന്റെ മകന്‍ ജൂലിയസ് നികിതാസിനെയും ഭാര്യയെയും വാഹനം തടഞ്ഞുനിര്‍ത്തി ആക്രമിച്ച കേസില്‍ അറസ്റ്റിലായി കോടതിയില്‍ നിന്ന് ജാമ്യത്തിലിറങ്ങിയതായിരുന്നു ശ്രീജു.