അമ്പലപ്പുഴ : ആലപ്പുഴ വണ്ടാനം മെഡിക്കല്‍ കോളജ് ആശുപത്രിയിലെ നവീകരത്തിച്ച മുറിയുടെ സീലിങ് ഇളകിവീണു. കെട്ടിടത്തിലെ കാഷ്വാല്‍റ്റി കൗണ്ടറിലെ സീലിങാണ് അടര്‍ന്നുവീണത്. ആര്‍ദ്രം പദ്ധതിയില്‍ ഉള്‍പെടുത്തി നവീകരിച്ചു കൊണ്ടിരിക്കുന്ന കെട്ടിടത്തിന്റെ അറ്റകുറ്റപണിയില്‍ വന്‍ അഴിമതി നടക്കുന്നുവെന്ന ആരോപണം നിലനില്‍ക്കുമ്പോഴാണ് കഴിഞ്ഞ ദിവസം ഉച്ചയോടെ സീലിങ് ഓരോന്നായ് അടര്‍ന്നുവീണത്. നവീകരണ പ്രവര്‍ത്തനങ്ങളുടെ നിരീക്ഷണത്തിനായി ആശുപത്രിയുടെ ഭാഗത്തുനിന്നും ഉദ്യോഗസ്ഥര്‍ ഇല്ലാത്തതും പിടിപ്പുകേടിന് കാരണമാകുന്നുണ്ട്. വര്‍ഷങ്ങളായി വികസന സമിതിയില്‍നിന്നും നിയമിതനായ ഒരാളാണ് ഇക്കാര്യങ്ങള്‍ കൈകാര്യം ചെയ്യുന്നത്. ഇയാളുടെ പ്രവര്‍ത്തനത്തിലും ആക്ഷേപം ഉയരുന്നുണ്ട്. ഇതേ രീതിയില്‍ ആര്‍ദ്രം പദ്ധതിയില്‍ ഉള്‍പ്പെടുത്തി നവീകരിച്ച പല കെട്ടിടങ്ങളും കുറഞ്ഞ കാലയളവില്‍തന്നെ നശിക്കുന്ന പതിവ് കാഴ്ചയാണ് കാണാന്‍ കഴിയുന്നത്. ലക്ഷങ്ങള്‍ ചെലവിടുന്ന പ്രവൃത്തികള്‍ നിരീക്ഷിക്കാന്‍ അടിയന്തിരമായി ആളെ നിയമിക്കണമെന്നും പ്രവര്‍ത്തനങ്ങളിലെ അഴിമതി ആരോഗ്യവകുപ്പ് വിജിലന്‍സ് വിഭാഗം അന്വേഷിക്കണമെന്ന ആവശ്യമാണുളളത്.