എരുമപ്പെട്ടി: പുതിയ സിനിമകള്‍ മൊബൈല്‍ ഫോണിലേയ്ക്ക് പകര്‍ത്തി നല്‍കിയിരുന്ന മൊബൈല്‍ ഷോപ്പ് ഉടമയെയും സഹായിയേയും ആന്റി പൈറസി സ്‌കോഡും പൊലിസും ചേര്‍ന്ന് പിടികൂടി .എരുമപ്പെട്ടി കടങ്ങോട് റോഡ് സെന്ററില്‍ പ്രവര്‍ത്തിക്കുന്ന ഡ്രീംസ് മൊബൈല്‍ ഷോപ്പ് ഉടമ വെള്ളറക്കാട് ആദൂര്‍ കുറ്റിയില്‍ അബ്ദുറഹ്മാന്‍, ജീവനക്കാരന്‍ തിരൂര്‍ താനൂര്‍ കിഴക്കുവീട്ടില്‍ റനീഷ് എന്നിവരാണ് പിടിയിലായത്. പുതിയ സിനിമകള്‍ മൊബൈല്‍ ഫോണില്‍ പകര്‍ത്തി നല്‍കുന്നുണ്ടെന്ന് രഹസ്യ വിവരം ലഭിച്ചതിന്റെ അടിസ്ഥാനത്തിലാണ് തിരുവനന്തപുരത്ത്‌നിന്നെത്തിയ ആന്റി പൈറസി സ്‌കോഡ് ഷോപ്പില്‍ റെയ്ഡ് നടത്തിയത്.രാവിലെ മുതല്‍ ഷോപ്പ് സ്‌കോഡിന്റെ നിരീക്ഷണത്തിലായിരുന്നു. രാത്രിയോടെയാണ് ഷോപ്പില്‍ മിന്നല്‍ പരിശോധന നടത്തിയത്. ടെയ്ക്ക് ഓഫ് ,ഹണീബി 2, മുന്തരിവള്ളികള്‍ തളിര്‍ക്കുമ്പോള്‍ ,പുത്തന്‍പണം, ജോര്‍ജേട്ടന്‍സ്പൂരം,സഖാവ് ,അങ്കമാലീസ് ഡയറിസ്,ഗ്രേയ്റ്റ്ഫാദര്‍ തുടങ്ങി നിരവധി പടങ്ങള്‍ പകര്‍ത്തി നല്‍കിവരുന്നതായി കണ്ടെത്തി. തുടര്‍ന്ന് എരുമപ്പെട്ടി എസ് .ഐ.മനോജ് കെ.ഗോപിയുടെ നേതൃത്വത്തില്‍ പൊലിസ് സ്ഥലത്തെത്തി ഉടമയെയും ജീവനക്കാരനെയും അറസ്റ്റ് ചെയ്തു . സിനിമകള്‍ പകര്‍ത്തി നല്‍കിയ കമ്പൂട്ടറും പൊലിസ് കസ്റ്റഡിയിലെടുത്തു .