വൈത്തിരി: തളിപ്പുഴ പുള്ളിക്കാരന്‍ കയറ്റത്തിന് സമീപത്തെ തട്ടുകട കത്തി നശിച്ചു. ആളപായമില്ല. കഴിഞ്ഞ ദിവസം പുലര്‍ച്ചെ രണ്ടോടെയാണ് സംഭവം. പഴയ വൈത്തിരി ചാരിറ്റി സ്വദേശി സൈത്, ജമാല്‍ എന്നിവര്‍ നടത്തുന്ന കടയാണ് കത്തി നശിച്ചത്. രാത്രിയോടെയാണ് സൈതും ജമാലും കട പൂട്ടി വീട്ടിലേക്ക് പോയത്.
പുലര്‍ച്ചെ ഒന്നരയോടെ ഈ വഴി പോയ യാത്രക്കാരാണ് സംഭവം കണ്ടത്. വിവരമറിയിച്ചതിനെ തുടര്‍ന്ന് സമീപവാസികളും കല്‍പ്പറ്റയില്‍ നിന്നു ഫയര്‍ ഫോഴ്‌സും എത്തി തീയണക്കുകയായിരുന്നു. ഗ്യാസ് സിലിണ്ടറിന് തീപിടിച്ച് വന്‍ ശബ്ദത്തോടെ പൊട്ടിത്തെറിച്ച ശബ്ദം കേട്ടാണ് സംഭവം യാത്രക്കാരുടെ ശ്രദ്ധയില്‍പ്പെട്ടത്.
അര്‍ധ രാത്രിയായതിനാല്‍ വന്‍ ദുരന്തം ഒഴിവായി. ഇതോടെ സാധാരണക്കാരായ രണ്ടു കുടുംബങ്ങളുടെ ജീവിത മാര്‍ഗമാണ് വഴിമുട്ടിയത്.
വൈത്തിരി പൊലിസ് കേസെടുത്ത് അന്വേഷണമാരംഭിച്ചു. ഗ്യാസ് സിലിണ്ടര്‍ പൊട്ടിത്തെറിച്ചതാണ് തീപിടിത്തത്തിന് കാരണമെന്നാണ് പൊലിസിന്റെ പ്രാഥമിക നിഗമനം.