കേളകം: ആറളം വന്യജീവി സങ്കേതത്തില്‍ കാട്ടാനകള്‍ ആന മതില്‍ തകര്‍ത്തു. കഴിഞ്ഞദിവസമാണ് ആറളം പുനരധിവാസ മേഖലയോട് ചേര്‍ന്ന പൂക്കുണ്ടില്‍ കാട്ടാനകള്‍ ആനമതില്‍ തകര്‍ത്തത്.
ഏതാനും ദിവസങ്ങള്‍ക്ക് മുന്‍പാണ് ജനവാസകേന്ദ്രത്തിലിറങ്ങിയ 17 ഓളം കാട്ടാനകളെ ആറ് ദിവസത്തെ പ്രയത്‌നത്തിനൊടുവില്‍ കാട്ടിലേക്ക് തുരത്തിയത്. കാട്ടാന ആക്രമണത്തില്‍ ചപ്പിലി കൃഷ്ണന്‍ മരിച്ചതിനെ തുടര്‍ന്നാണ് ആറളം പുനരധിവാസ മേഖലയിലെ കാട്ടാനകളെ തുരത്തുന്നതിന് വനംവകുപ്പ് തീരുമാനമെടുത്തത്. എന്നാല്‍ ആനമതില്‍ തകര്‍ത്ത ഭാഗത്തുകൂടി കാട്ടാനകള്‍ പുനരധിവാസ കേന്ദ്രത്തിലേക്ക് എത്തുന്നത് തടയുന്നതിനായി വനപാലകര്‍ കാവല്‍ ഏര്‍പ്പെടുത്തിയിരുന്നെങ്കിലും കഴിഞ്ഞദിവസം രാത്രിയാണ് പൂക്കുണ്ടില്‍ കാട്ടാനകള്‍ ആനമതില്‍ തകര്‍ത്തത്.
ഈ വഴി കാട്ടാന പുനരധിവാസ കേന്ദ്രത്തിലേക്ക് കടന്നില്ലെങ്കിലും ആന മതില്‍ തകര്‍ന്ന മറ്റ് ഭാഗങ്ങളിലൂടെ നാലോളം കാട്ടാനകള്‍ പുനരധിവാസ മേഖലയില്‍ വീണ്ടുമെത്തിയിട്ടുണ്ടെന്നാണ് വിവരം. വനപാലകര്‍ ഇവയെ കാട്ടിലേക്ക് തുരത്താനുള്ള ശ്രമം ആരംഭിച്ചിട്ടുണ്ട്.