അമേത്തി: ഉത്തര്‍പ്രദേശില്‍ ട്രെയിനില്‍ സ്‌ഫോടകവസ്തു കണ്ടെത്തി. ഹൊവാറില്‍ നിന്ന് അമൃതസറിലേയ്ക്കു പോകുന്ന ട്രെയിനിലാണ് ബോംബ് കണ്ടെത്തിയത്. കുറഞ്ഞ സ്‌ഫോടനശേഷിയുള്ള ബോംബാണ് കണ്ടെത്തിയതെന്നും ഇത് നിര്‍വ്വീര്യമാക്കിയെന്നും പൊലിസ് സൂപ്രണ്ട് സൗമിത്ര യാദവ് പറഞ്ഞു.


ഉടമസ്ഥനില്ലാത്ത ഒരു പൊതി കണ്ടെത്തിയതിനെ തുടര്‍ന്ന് അമേത്തി സ്‌റ്റേഷനില്‍ ട്രെയിന്‍ നിര്‍ത്തുകയും രണ്ട് ബോഗികളില്‍നിന്ന് യാത്രക്കാരെ ഇറക്കി പരിശോധന നടത്തുകയായിരുന്നു.

ബോംബിനൊപ്പം ഒരു ഭീഷണിക്കത്തും ഉണ്ടായിരുന്നതായി റിപ്പോര്‍ട്ടുകള്‍ പറയുന്നു. ലഷ്‌കര്‍ ഇ തൊയ്ബ തീവ്രവാദി അബു ദുജാനയുടെ വധത്തിന് പ്രതികാരം ചെയ്യുമെന്നാണ് കത്തിലെ ഭീഷണി.

അതേസമയം, ട്രെയിനില്‍നിന്ന് സ്‌ഫോടകവസ്തു കണ്ടെത്തിയ സംഭവത്തിന് ഭീകരബന്ധമില്ലെന്ന് റെയില്‍വേ ഡിവിഷണല്‍ മാനേജര്‍ ശിവേന്ദ്ര ശുക്ല അറിയിച്ചു. സംഭവം പൊലിസ് അന്വേഷിച്ചുവരികയാണെന്നും അദ്ദേഹം വ്യക്തമാക്കി.