കാക്കനാട്: രണ്ടേകാല്‍ കിലോഗ്രാം തൂക്കം വരുന്ന ആനക്കൊമ്പുമായെത്തിയ യുവാവ് എസ്.പി.സി.എ സംഘത്തിന്റെ വലയിലായി. പട്ടാമ്പി സ്വദേശിയായ രതീഷ് കുമാര്‍ (31) ആണ് പിടിയിലായത്. ഇന്നലെ രാവിലെ പതിനൊന്നരയോടെ പാലാരിവട്ടം പൈപ്പ് ലൈനില്‍ വച്ചാണ് എസ്.പി.സി.എ സംഘവും വനം വകുപ്പ് അധികൃതരും ചേര്‍ന്ന് പ്രതിയെ പിടികൂടിയത്.
ആനക്കൊമ്പ് വില്‍പനക്കായെത്തിയ രതീഷ് കുമാര്‍ ഒരാഴ്ചയായി എസ്.പി.സി.എ സംഘത്തിന്റെ നിരീക്ഷണത്തിലായിരുന്നു. എസ്.പി.സി.എ ചെയര്‍പേഴ്‌സണ്‍ കൂടിയായ ജില്ലാ പഞ്ചായത്ത് പ്രസിഡന്റ് ആശാസനലിന് ലഭിച്ച രഹസ്യവിവരത്തിന്റെ അടിസ്ഥാനത്തില്‍ വനം വകുപ്പ് അധികൃതരുടെ സഹായത്തോടെ പരിശോധനക്കിറങ്ങുകയായിരുന്നു. രണ്ടര ലക്ഷത്തോളം രൂപ മതിപ്പുവിലയുള്ള ആനക്കൊമ്പാണ് പിടികൂടിയത്. എസ്.പി.സി.എ ഇന്‍സ്‌പെക്ടര്‍ ടി.എം.സജിത്ത്, വനം വകുപ്പ് ഫ്‌ലയിംഗ് സ്‌ക്വാഡ് റെയ്ഞ്ച് ഓഫീസര്‍ ജയചന്ദ്രന്‍, ഇന്‍സ്‌പെക്ടിംഗ് അസിസ്റ്റന്റ് കെ.ബി. ഇക്ബാല്‍ എന്നിവരടങ്ങിയ സംഘമാണ് പ്രതിയെ പിടികൂടിയത്. തോള്‍സഞ്ചിയില്‍ ആനക്കൊമ്പുമായി സ്വകാര്യ ബസില്‍ വന്നിറങ്ങിയ യുവാവിനെ തന്ത്രപൂര്‍വ്വം പിടികൂടുകയായിരുന്നു. കൊടുങ്ങല്ലൂരില്‍ നിന്നാണ് തനിക്ക് ആനക്കൊമ്പ് ലഭിച്ചതെന്ന് യുവാവ് അന്വേഷണ സംഘത്തോട് സമ്മതിച്ചു.