തളിപ്പറമ്പ്: ടൗണ്‍സ്‌ക്വയറിനു സമീപത്തം 1.2 കിലോഗ്രാം കഞ്ചാവുമായി മധ്യവയസ്‌കന്‍ പിടിയില്‍. രഹസ്യവിവരത്തെ തുടര്‍ന്ന് ഇന്നലെ രാവിലെ 10.30 ഓടെയാണ് തളിപ്പറമ്പ് എസ്.ഐ ബിനുമോഹന്റെ നേതൃത്വത്തില്‍ പരിശോധന നടത്തിയത്. കടലാസില്‍ പൊതിഞ്ഞ് പ്ലാസ്റ്റിക്ക് സഞ്ചിയിലാക്കി കൊണ്ടുപോകുകയായിരുന്ന കഞ്ചാവുമായി വളപട്ടണം കീരിയാട് സ്വദേശി പി.കെ സാദിഖി(42)നെയാണ് പിടികൂടിയത്. ഇയാള്‍ നിരവധി മയക്കുമരുന്ന് കേസുകളില്‍ പ്രതിയാണെന്ന് പൊലിസ് പറഞ്ഞു. പയ്യന്നൂര്‍ ഭാഗത്ത് വിതരണം ചെയ്യുന്നതിനായി കൊണ്ടുപോകവെയാണ് സാദിഖ് കഞ്ചാവ സഹിതം പിടിയാലാകുന്നത്. പാലക്കാടു നിന്നാണ് ഇയാള്‍ക്ക് മറ്റൊരാള്‍ കഞ്ചാവ് എത്തിച്ചു നല്‍കുന്നത്. ആഴ്ചയില്‍ പത്ത് കിലോ വരെ കഞ്ചാവ് കൈമാറ്റം നടത്താറുണ്ടെന്ന് ഇയാള്‍ പൊലിസിനോട് സമ്മതിച്ചു. തലശ്ശേരിയില്‍ മയക്കുമരുന്ന് കടത്തു കേസുകളില്‍ പ്രതിയായ സാദിഖ് ഈ മേഖലയില്‍ സജീവമായ വന്‍ മയക്കുമരുന്ന് മാഫിയയിലെ പ്രധാന കണ്ണിയാണ്. മജിസ്‌ട്രേട്ടിനു മുന്നില്‍ ഹാജരാക്കിയ പ്രതിയെ റിമാന്‍ഡു ചെയ്തു. പരിശോധനാ സ്‌ക്വാഡില്‍ എ.എസ്.ഐ ശാരങ്കതന്‍, സി.പിഒമാരായ രമേശന്‍, ജാബിര്‍, ഷാജു, മാത്യു എന്നിവരും ഉണ്ടായിരുന്നു.