കൊച്ചി: നടിയെ ആക്രമിച്ച കേസില്‍ ജയിലില്‍ കഴിയുന്ന ദിലീപ് ജാമ്യം തേടി വീണ്ടും ഹൈക്കോടതിയില്‍. ഇന്ന് ഉച്ചയോടെ അഭിഭാഷകന്‍ ബി. രാമന്‍പിള്ള മുഖേനയാണ് ദിലീപ് ജാമ്യാപേക്ഷ സമര്‍പ്പിച്ചത്. ഗൂഢാലോചന കുറ്റം ചുമത്തപ്പെട്ട് ദിലീപ് ജയിലിലായിട്ട് ഇന്നേക്ക് ഒരുമാസം തികയുകയാണ്.

മാധ്യമങ്ങളും പൊലിസ് ഉദ്യോഗസ്ഥരും തനിക്കെതിരെ ഗൂഢലോചന നടത്തി. പള്‍സര്‍ സുനിയെ മുഖപരിചയം പോലുമില്ല.
അന്വേഷണവുമായി പൂര്‍ണമായും സഹകരിച്ചിട്ടുണ്ട്. ഷൂട്ടിങ് കഴിഞ്ഞതും വരാനിരിക്കുന്നതുമായി ചിത്രങ്ങള്‍ പ്രതിസന്ധിയിലാണ്. അന്‍പതു കോടിയോളം രൂപ ഇതിനായി മുടക്കിയിട്ടുണ്ടെന്നും ജാമ്യാപേക്ഷയില്‍ ചൂണ്ടിക്കാട്ടുന്നു. നാളെയാണ് ജാമ്യഹരജി കോടതി പരിഗണിക്കുക.

നേരത്തെ ഹൈക്കോടതി ദിലീപിന് ജാമ്യം നിഷേധിച്ചിരുന്നു. അങ്കമാലി മജിസ്‌ട്രേറ്റ് കോടതിയില്‍ സമര്‍പ്പിച്ച ജാമ്യാപേക്ഷ തള്ളിയതിനെ തുടര്‍ന്നാണ് ഹൈക്കോടതിയില്‍ ജാമ്യാപേക്ഷ നല്‍കിയത്.

അതേസമയം നടിയെ ആക്രമിച്ച കേസില്‍ സംവിധായകന്‍ വൈശാഖ് അന്വേഷണ സംഘത്തിനു മുന്നില്‍ ഹാജരായി. ആലുവ പൊലിസ് ക്ലബ്ബില്‍ വെച്ചാണ് വൈശാഖിന്റെ മൊഴിയെടുത്തത്. ദിലീപ് അഭിനയിച്ച വൈശാഖ് ചിത്രത്തിന്റെ ലൊക്കേഷനില്‍ പള്‍സര്‍ സുനി എത്തിയിരുന്നു. ഇതിനെ കുറിച്ച് അറിയുന്നതിനാണ് വൈശാഖിനെ വിളിച്ചതെന്നാണ് സൂചന.