കല്ലമ്പലം: സംസ്ഥാന യുവജന കമ്മിഷന്‍ അധ്യക്ഷയും ഡി.വൈ.എഫ്.ഐ കേന്ദ്ര കമ്മിറ്റി അംഗവുമായ ചിന്താ ജറോമിന്റെ വാഹനത്തിനു നേരെ യുവാവിന്റെ ആക്രമണം. വ്യാഴാഴ്ച ഉച്ചയ്ക്ക് 11.30ന് കല്ലമ്പലം ജങ്ഷനിലാണ് ചിന്താ ജറോം സഞ്ചരിച്ച വാഹനത്തിന് നേരെ ആക്രമണമുണ്ടായത്.
വെട്ടുകത്തിയുമായി വന്ന യുവാവ് ആക്രോശിച്ചു കൊണ്ട് കാറിന്റെ മുന്‍വശത്തു വെട്ടുകയായിരുന്നു. അതിനു ശേഷം ബോണറ്റിലൂടെ വാഹനത്തിന് മുകളില്‍ കയറി തുരുതുരാ വെട്ടി. മുന്‍വശത്തെ ഗ്ലാസ് പൂര്‍ണമായും തകര്‍ന്നു. ചിറയിന്‍കീഴ് ആനത്തലവട്ടം സ്വദേശി കൂട്ടില്‍ വീട്ടില്‍ വിശാഖ് (25) ആണ് ആക്രമണം നടത്തിയത്. യുവാവിനെ നാട്ടുകാര്‍ പിടികൂടി പൊലിസില്‍ ഏല്‍പ്പിച്ചു. വധശ്രമത്തിന് പൊലിസ് കേസെടുത്തു.
ഗതാഗത തടസം ഉള്ളതിനാല്‍ കാര്‍ പതുക്കെമുന്നോട്ട് പോകുമ്പോഴായിരുന്നു ആക്രമണം. മദ്യത്തിനും കഞ്ചാവിനും അടിമയായ യുവാവിനെതിരേ ചിറയിന്‍കീഴ് പൊലിസ് സ്റ്റേഷനില്‍ സമാനമായ അഞ്ചു കേസുകള്‍ നിലവിലുണ്ട്. ഇടയ്ക്കിടെ ഗള്‍ഫില്‍ പോകുന്ന ഇയാള്‍ നാട്ടിലെത്തിയാല്‍ ഇത്തരം അതിക്രമങ്ങള്‍ നടത്താറുണ്ടെന്ന് കല്ലമ്പലം പൊലിസ് പറഞ്ഞു. കേസിന്റെ തുടരന്വേഷണം വര്‍ക്കല സി.ഐയുടെ നേതൃത്വത്തില്‍ നടക്കും.