പയ്യോളി: കര കൗശലങ്ങളുടെയും കൗതുകക്കാഴ്ചകളുടെയും നിറകണ്‍ വിരുന്നൊരുക്കി സര്‍ഗാലയ മേളയ്ക്ക് തുടക്കം. മേളയിലെ 250 പവലിയനുകളില്‍ സന്ദര്‍ശകരുടെ ശ്രദ്ധ കവരുകയാണ് നേപ്പാളിലെ കാഠ്മണ്ഡുവില്‍ നിന്നെത്തിയ കലാകാരന്മാര്‍. സിന്ധു പാല്‍ച്ചോക്ക് ജില്ലയിലെ സുങ്ക്ഹാനിയില്‍ നിന്നുമാണ് പ്രേം ലാമയും പസന്ത് വിക്രംലാമയും (മംഗള്‍പുത്ര) അക്രിലിക് ചിത്രങ്ങളുടെ വിപുലമായ ശേഖരവുമായെത്തിയത്. തിബത്തന്‍ ലാമ വിഭാഗത്തില്‍പെട്ട ഇവര്‍ ബുദ്ധിസവുമായി ബന്ധപ്പെട്ട ചിത്രങ്ങള്‍ക്കാണ് ഏറെ പ്രാമുഖ്യം നല്‍കുന്നത്. കാന്‍വാസില്‍ അക്രിലിക് മാധ്യമത്തില്‍ തീര്‍ത്ത ബുദ്ധന്റെയും ഗണപതിയുടെയും ചിത്രങ്ങളാണു പ്രധാനമായുമുള്ളത്. 5ത4 അടി വലിപ്പത്തിലുള്ള മഞ്ഞയിലും ബ്രൗണ്‍ നിറത്തിലും പൂര്‍ത്തിയാക്കിയ ധ്യാനനിമഗ്‌നായ ബുദ്ധചിത്രത്തിനു 1,80,000 രൂപയാണു വില. 22ത16 ഇഞ്ച് വലിപ്പത്തിലുള്ള ചിത്രത്തിനു 12,000 രൂപയുമുണ്ട്. മംഗള്‍പുത്രയെന്ന തൂലികാനാമത്തിലറിയപ്പെടുന്ന 40കാരനായ പസന്ത് വിക്രം ലാമയാണ് മനോഹര ചിത്രങ്ങള്‍ വരച്ചിട്ടുള്ളത്. 20 വര്‍ഷമായി ഇദ്ദേഹം അക്രിലിക് ചിത്രരചനാ രംഗത്തുണ്ട്. പ്രേം ലാമയുടെ ഉടമസ്ഥതയിലുള്ള നേപ്പാളി ഉല്‍പന്നങ്ങളുടെ വിതരണക്കാരായ ധര്‍മ്മ സപ്ലയേഴ്‌സ് എന്ന സ്ഥാപനമാണു സര്‍ഗാലയയിലെ പവലിയന്‍ ഒരുക്കിയിട്ടുള്ളത്. ചിത്രങ്ങള്‍ കൂടാതെ വിവിധ മുഖത്തിലുള്ള രുദ്രാക്ഷങ്ങളുടെ ശേഖരവും വില്‍പനയ്ക്കായുണ്ട്. ആഭരണങ്ങള്‍, തുണിയില്‍ തീര്‍ത്ത ഉല്‍പന്നങ്ങള്‍ തുടങ്ങി 700 ഓളം ഉല്‍പന്നങ്ങള്‍ ഇവരുടെ സ്റ്റാളില്‍ ഒരുക്കിയിട്ടുണ്ട്. ഇതാദ്യമായാണ് കേരളത്തിലെത്തിയതെന്ന് മംഗള്‍പുത്ര സുപ്രഭാതത്തോട് പറഞ്ഞു.