ഗുരുവായൂര്‍: ഗുരുവായൂര്‍ ക്ഷേത്രത്തില്‍ പ്രസാദ ഊട്ടിന് തയാറാക്കിയ  പാല്‍പ്പായസത്തില്‍ പാമ്പിന്‍ കുഞ്ഞിനെ കണ്ടെത്തി. ക്ഷേത്രത്തിന് പടിഞ്ഞാറു ഭാഗത്തെ അന്നലക്ഷ്മി ഹാളില്‍ ഇന്നലെ പ്രസാദ ഊട്ടിനൊപ്പം വിളമ്പുന്നതിനായി തയാറാക്കിയ  പാല്‍പ്പായസ പാത്രത്തിലാണ്  പാമ്പിന്‍ കുഞ്ഞ് വീണ് കിടക്കുന്നത് ശ്രദ്ധയില്‍പ്പെട്ടത്. മൂന്ന് വലിയ കുട്ടകത്തിലാക്കിയാണ് പാല്‍പ്പായസം സൂക്ഷിച്ചിരുന്നത്. ക്ഷേത്രത്തിനകത്ത് തയാറാക്കിയ പാല്‍പ്പായസം കുട്ടകത്തിലാക്കി കൊണ്ടുവന്ന് വച്ചതായിരുന്നു. വിളമ്പുന്നതിനായി പ്രസാദ ഊട്ടിന് മേല്‍നോട്ടം വഹിക്കുന്ന കീഴ്ശാന്തി നോക്കിയപ്പോഴാണ് പായസത്തില്‍ പാമ്പിന്‍ കുഞ്ഞിനെ   കണ്ടത്. തുടര്‍ന്ന് മൂന്ന് കുട്ടകത്തിലേയും പായസം പുറത്ത് കൊണ്ടുപോയി നശിപ്പിച്ചു.  പാമ്പ് ഹാളിന്റെ മേല്‍ക്കൂരയില്‍ നിന്ന് വീണതാണെന്ന് സംശയിക്കുന്നു.