കോഴിക്കോട്: പതിനൊന്നാമത് സില്‍വര്‍ഹില്‍സ് ട്രോഫിക്ക് വേണ്ടിയുള്ള അഖില കേരള ഇന്റര്‍ സ്‌കൂള്‍ ബാസ്‌ക്കറ്റ്‌ബോള്‍ ടൂര്‍ണമെന്റിന് നാളെ സില്‍വര്‍ഹില്‍സ് സ്‌കൂളില്‍ തുടക്കമാകും. സംസ്ഥാനത്ത് നിന്നുള്ള 30 ടീമുകള്‍ 15 വരെ നീണ്ടു നില്‍ക്കുന്ന ടൂര്‍ണമെന്റില്‍ മാറ്റുരയ്ക്കും. ലീഗ് കം നോക്കൗട്ട് രീതിയില്‍ ക്രമീകരിച്ചിരിക്കുന്ന മത്സരത്തില്‍ ആണ്‍കുട്ടികളുടെ വിഭാഗത്തില്‍ 12 സ്‌കൂളുകളും പെണ്‍കുട്ടികളുടെ വിഭാഗത്തില്‍ എട്ട് സ്‌കൂളുകളും പങ്കെടുക്കും.
ഉദ്ഘാടന മത്സരത്തില്‍ ആണ്‍കുട്ടികളുടെ വിഭാഗത്തില്‍ സില്‍വര്‍ ഹില്‍സ് എച്ച്.എസ്. എസ് കോഴിക്കോട്, ഡോണ്‍ബോസ്‌കോ എച്ച്.എസ്.എസ് ഇരിങ്ങാലക്കുടയെയും പെണ്‍കുട്ടികളുടെ വിഭാഗത്തില്‍ സെന്റ് മൈക്കിള്‍സ് എച്ച്.എസ്.എസ് കോഴിക്കോട്, സ്‌പോര്‍ട്‌സ് ഡിവിഷന്‍ കണ്ണൂരിനെയും നേരിടും. ക്വാര്‍ട്ടര്‍ ഫൈനല്‍ മത്സരങ്ങള്‍ 14 ന് രാവിലെയും സെമി ഫൈനല്‍ മത്സരങ്ങള്‍ ഉച്ചയ്ക്ക് ശേഷവും നടക്കും.
നാളെ രാവിലെ 10ന് ടൂര്‍ണമെന്റിന്റെ ഉദ്ഘാടനം മേയര്‍ തോട്ടത്തില്‍ രവീന്ദ്രന്‍ നിര്‍വഹിക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. ചലച്ചിത്ര താരം സുധീഷ്, ഗായിക ശ്രേയ ജയദീപ് ഉദ്ഘാടന സമ്മേളനത്തില്‍ സംബന്ധിക്കും. 15 ന് നടക്കുന്ന സമാപന ചടങ്ങില്‍ കലക്ടര്‍ യു.വി ജോസ്, മുഖ്യാതിഥിയും, ഒളിംപ്യന്‍ സിനിമോള്‍ പൗലോസ് വിശിഷ്ടാതിഥിയാകും. ടൂര്‍ണമെന്റ് കണ്‍വീനര്‍ ഡോ. ഫാ ബിജു ജോണ്‍ വെള്ളക്കട, ഓര്‍ഗനൈസിങ് സെക്രട്ടറി ജോസ് സെബാസ്റ്റ്യന്‍, പി.ടി.എ പ്രസിഡന്റ് പി.എ തങ്കച്ചന്‍ വാര്‍ത്താസമ്മേളനത്തില്‍ സംബന്ധിച്ചു.