മഞ്ചേരി: ജില്ലാ കുടുംബശ്രീ മിഷന്‍ സംഘടിപ്പിക്കുന്ന ജില്ലാതല ഭക്ഷ്യമേള 'ഉമ്മാന്റെ വടക്കിനി' നാളെ മഞ്ചേരിയില്‍ തുടങ്ങും. നഗരസഭാ ചെയര്‍പേഴ്‌സണ്‍ വി.എം സുബൈദ ഉദ്ഘാടനം ചെയ്യും. ജില്ലയിലെ 16ാമത്തെ ഭക്ഷ്യമേളയാണ് ചുള്ളക്കാട് ഗവ. യു.പി സ്‌കൂളില്‍ സംഘടിപ്പിക്കുന്നത്. കുടുംബശ്രീ യൂനിറ്റുകള്‍ തയാറാക്കുന്ന വിഭവങ്ങളായ കരിഞ്ചീരകക്കോഴി, മലബാര്‍ ദം ബിരിയാണി, ചിക്കന്‍ പൊള്ളിച്ചത്, ചതിക്കാത്ത സുന്ദരി, നൈസ് പത്തിരി, കപ്പ ബിരിയാണി, ഗ്രീന്‍ ചിക്കന്‍, വിവിധ തരം പായസങ്ങള്‍, ജ്യൂസുകള്‍, വിവിധ തരം കേക്കുകള്‍, പലഹാരങ്ങള്‍ എന്നിവ മേളയിലെ പ്രധാന ആകര്‍ഷണങ്ങളാണ്. ജില്ലയുടെ വിവിധ ഭാഗങ്ങളില്‍നിന്നായി പത്തോളം ഭക്ഷ്യ ഉല്‍പാദന യൂനിറ്റുകളാണ് മേളയില്‍ പങ്കെടുക്കുന്നത്. മേള 25നു രാത്രി സമാപിക്കും.