ന്യൂഡല്‍ഹി : സിഖ് വിരുദ്ധ കലാപത്തെ ന്യായീകരിച്ച മുന്‍ പ്രധാനമന്ത്രി രാജീവ് ഗാന്ധിയുടെ ഭാരത് രത്‌ന പുരസ്‌കാരം തിരിച്ചെടുക്കണമെന്ന് ആവശ്യപ്പെട്ട് ഡല്‍ഹി നിയമസഭ പ്രമേയം പാസാക്കിയതോടെ ആം ആദ്മി പാര്‍ട്ടിയില്‍ പൊട്ടിത്തെറി. രാജീവ് ഗാന്ധിക്ക് മരണാനന്തരം നല്‍കിയ ഭാരത രത്‌ന ബഹുമതി തിരിച്ചെടുക്കണമെന്ന പ്രമേയത്തെ എതിര്‍ത്ത എം.എല്‍.എയോട് രാജിവയ്ക്കാന്‍ ആം ആദ്മി പാര്‍ട്ടി ആവശ്യപ്പെട്ടു. ചാന്ദ്‌നി ചൗക്കില്‍ നിന്നുള്ള അല്‍ക്ക ലാംബയോടാണ് പാര്‍ട്ടി രാജി ആവശ്യപ്പെട്ടത്.
നിയമസഭയില്‍ അംഗങ്ങള്‍ക്കിടയില്‍ വിതരണം ചെയ്ത പ്രമേയത്തിന്റെ പകര്‍പ്പില്‍ രാജീവ് ഗാന്ധിയുടെ പേര് പരാമര്‍ശിച്ചിട്ടില്ലെന്ന് എ.എ.പി വക്താവ് സൗരഭ് ഭരദ്വാജ് പറഞ്ഞു.
പ്രമേയത്തിലെ രാജീവ് ഗാന്ധിയുടെ പേര് പരാമര്‍ശിക്കുന്നവരി പ്രമേയം അവതരിപ്പിച്ച എം.എല്‍.എ ജര്‍ണൈല്‍ സിങ് സ്വന്തമായി കൂട്ടിചേര്‍ത്തതാണെന്നാണ് മാളവ്യ നഗര്‍ എം.എല്‍.എ സോംനാഥ് ഭാരതിയും സ്പീക്കര്‍ രാംവിലാസ് ഗോയലും പറഞ്ഞത്. ജര്‍ണൈല്‍ സിങ് തന്റെ നിയമസഭാ പ്രസംഗത്തില്‍ ആ വാചകം സ്വന്തം ഇഷ്ടം പ്രകാരം കൂട്ടിച്ചേര്‍ക്കുകയായിരുന്നുവെന്നാണ് ഗോയല്‍ വ്യക്തമാക്കിയത്.
എന്നാല്‍, ജര്‍ണൈല്‍ സിങ് അവതരിപ്പിച്ച പ്രമേയത്തില്‍ മുന്‍ പ്രധാനമന്ത്രിയെ പരാമര്‍ശിക്കുന്ന ഭാഗമുണ്ടെന്നും നിയമ സഭാ രേഖകളുടെ ഭാഗമായ പ്രമേയമാണ് പാസാക്കിയതെന്നുമാണ് എ.എ.പി വൃത്തങ്ങള്‍ നേരത്തെ വ്യക്തമാക്കിയിരുന്നത്.
പ്രമേയത്തെ എതിര്‍ത്ത ഭാരതിക്കും ലാംബയ്ക്കുമെതിരേ അച്ചടക്ക നടപടി ആവശ്യപ്പെട്ടിട്ടുണ്ടെന്ന് പാര്‍ട്ടി വൃത്തങ്ങള്‍ പറഞ്ഞു. മുഖ്യമന്ത്രി അരവിന്ദ് കെജരിവാള്‍ തന്നോട് രാജിവയ്ക്കാന്‍ ആവശ്യപ്പെട്ടിട്ടുണ്ടെന്ന് സ്ഥിരീകരിച്ച അല്‍ക, ഇന്നലെ രാജിക്കത്ത് നല്‍കുമെന്നും അറിയിച്ചിരുന്നു. എന്നാല്‍ പ്രമേയത്തെ എതിര്‍ത്ത ആരില്‍നിന്നും കെജ്‌രിവാള്‍ രാജി ആവശ്യപ്പെട്ടിട്ടില്ലെന്ന് ഡല്‍ഹി ഉപമുഖ്യമന്ത്രി മനീഷ് സിസോദിയ വ്യക്തമാക്കി. ഇതിനു പിന്നാലെ, രാജീവ് ഗാന്ധിയുടെ ഭാരത്‌രത്‌ന പിന്‍വലിക്കണമെന്നത് താന്‍ വൈകാരികമായി പറഞ്ഞു പോയതാണെന്നും ഇക്കാര്യം പ്രമേയത്തില്‍ ഉള്‍പ്പെടുത്തിയിട്ടില്ലെന്നും ജര്‍ണൈല്‍ സിങ്ങ് വിശദീകരിച്ചു.