തിരുവനന്തപുരം: നിങ്ങള്‍ക്ക് നടക്കാനാവാത്തതിനാല്‍ പുറം ലോകം കാണാന്‍ പറ്റുന്നില്ലേ? എന്നാല്‍ നിങ്ങള്‍ക്ക് സഹായ ഹസ്തം നീട്ടി സംസ്ഥാന സര്‍ക്കാര്‍. സൗജന്യമായി ഇലക്ട്രിക് വീല്‍ചെയര്‍ നല്‍കുന്ന ശുഭയാത്ര പദ്ധതിയുമായാണ് സര്‍ക്കാര്‍ ഭിന്നശേഷിക്കാര്‍ക്ക് കൈത്താങ്ങാകുന്നത്.
സംസ്ഥാന വികലാംഗ ക്ഷേമ കോര്‍പറേഷന്‍ വഴിയാണ് ശുഭയാത്ര പദ്ധതി ഒരുക്കുന്നത്. നാല്‍പ്പത് ശതമാനത്തിനു മുകളില്‍ ചലനപരിമിതിയുള്ളവരും സ്ഥിരം ഭിന്നശേഷിയുള്ളവര്‍ക്കുമായാണ് ശുഭയാത്ര പദ്ധതി. ജില്ല ആശുപത്രിയിലെയോ താലൂക്ക് ആശുപത്രിയിലെയോ വിദഗ്ധ സമിതി നല്‍കുന്ന സര്‍ട്ടിഫിക്കറ്റും സ്വന്തമായി ഇലക്ട്രിക് വീല്‍ചെയര്‍ പ്രവര്‍ത്തിക്കാന്‍ കഴിയുമെന്ന ഡോക്ടറുടെ സര്‍ട്ടിഫിക്കറ്റും അപേക്ഷയോടൊപ്പം നല്‍കണം. ഒരുലക്ഷം രൂപയില്‍ താഴെ വാര്‍ഷിക വരുമാനമുള്ളവരാണ് അപേക്ഷിക്കേണ്ടത്. കഴിഞ്ഞ എട്ടുവര്‍ഷത്തിനുള്ളില്‍ സര്‍ക്കാര്‍ സ്ഥാപനങ്ങളില്‍ നിന്നോ തദ്ദേശ സ്വയംഭരണ സ്ഥാപനങ്ങളില്‍ നിന്നോ ഇലക്ട്രിക് വീല്‍ചെയറോ സ്‌കൂട്ടറോ ലഭിച്ചവര്‍ അപേക്ഷിക്കേണ്ടതില്ല. അപേക്ഷകളുടെ പരിശോധനയ്ക്ക് ശേഷം മാര്‍ക്കിന്റെ അടിസ്ഥാനത്തിലാകും ഗുണഭോക്താക്കളെ തിരഞ്ഞെടുക്കുന്നത്.
ജനുവരി അഞ്ചിന് മുന്‍പേ സംസ്ഥാന വികലാംഗ ക്ഷേമ കോര്‍പറേഷനിലാണ് അപേക്ഷ സമര്‍പ്പിക്കേണ്ടത്.
അപേക്ഷയോടൊപ്പം രണ്ട് പാസ്‌പോര്‍ട്ട് സൈസ് ഫോട്ടോ, ആധാര്‍ കാര്‍ഡിന്റെ സ്വയം സാക്ഷ്യപ്പെടുത്തിയ പകര്‍പ്പ്, റേഷന്‍ കാര്‍ഡിന്റെ ഒന്ന്, രണ്ട് അവസാന പേജുകളുടെ സ്വയം സാക്ഷ്യപ്പെടുത്തിയ പകര്‍പ്പ്, വാര്‍ഷികവരുമാന സര്‍ട്ടിഫിക്കറ്റ്, ഭിന്നശേഷിത്വം തെളിയിക്കുന്ന മെഡിക്കല്‍ ബോര്‍ഡ് സര്‍ട്ടിഫിക്കറ്റിന്റെ സാക്ഷ്യപ്പെടുത്തിയ പകര്‍പ്പ്, എട്ടുവര്‍ഷത്തിനുള്ളില്‍ മുച്ചക്രവാഹനമോ ഇലക്ട്രിക് വീല്‍ചെയറോ തദ്ദേശ സ്ഥാപനങ്ങളില്‍ നിന്ന് ലഭിച്ചിട്ടില്ലെന്ന് സെക്രട്ടറി നല്‍കുന്ന കത്ത് എന്നിവയും ചേര്‍ക്കണം. വിവരങ്ങള്‍ക്ക്: 0471 2347768, 7510729871