തൊട്ടില്‍പ്പാലം: കാന്തപുരം വിഭാഗത്തിന്റെ സ്ഥാപനത്തില്‍ മുജാഹിദ് നേതാവിന്റെ പഠനക്ലാസ് വിവാദത്തില്‍. പേരോട് അബ്ദുറഹ്മാന്‍ സഖാഫി നേതൃത്വം നല്‍കുന്ന കുറ്റ്യാടിയിലെ സിറാജുല്‍ ഹുദയിലാണ് മുജാഹിദ് നേതാവായ അലി അക്ബര്‍ മൗലവി ഇരിവേറ്റി പഠനക്ലാസ് നടത്തിയത്. ഓഗസ്റ്റ് അഞ്ചിനാണ് സംഭവം.
സ്ഥാപനത്തിന് കീഴിലെ അറബിക് കോളജുകളിലും മദ്‌റസകളിലും മറ്റും ജോലിചെയ്യുന്ന അധ്യാപകര്‍ക്കായി അതീവരഹസ്യമായി സംഘടിപ്പിച്ച ക്ലാസ് ഇന്നലെയാണ് സമൂഹമാധ്യമങ്ങളിലൂടെ പുറംലോകമറിഞ്ഞത്. മുജാഹിദ് വിഭാഗവുമായി ഒരു സഹകരണവും പാടില്ലെന്ന നിലപാടാണ് കാന്തപുരം വിഭാഗം സ്വീകരിച്ചിരുന്നത്. ഇതിന് വിരുദ്ധമായാണ് സ്ഥാപനത്തില്‍ നടന്ന പരിപാടി.
കേരള നദ്‌വത്തുല്‍ മുജാഹിദീന്റെ ഔദ്യോഗിക വിഭാഗമായ ഐ.എസ്.എം സംസ്ഥാന വൈസ് പ്രസിഡന്റാണ് ക്ലാസിന് നേതൃത്വം നല്‍കിയ അലി അക്ബര്‍. സംഭവം ആരും അറിയാതിരിക്കാന്‍ തുടക്കത്തില്‍ തന്നെ പങ്കെടുക്കാനെത്തിയ മുഴുവന്‍പേരുടെയും മൊബൈല്‍ഫോണ്‍ ഓഫ് ചെയ്യിപ്പിച്ചായിരുന്നു ക്ലാസാരംഭിച്ചത്. പുറംലോകം ഒരുതരത്തിലും അറിയാതിരിക്കാനായിരുന്നു ഇങ്ങനെ ചെയ്തതെങ്കിലും പിന്നീട് സോഷ്യല്‍ മീഡിയകളിലൂടെ പ്രചരിക്കുകയായിരുന്നു. എന്നാല്‍ പുറമെ മുജാഹിദ് ആശയങ്ങളെ ശക്തമായി എതിര്‍ക്കുന്നു എന്ന് വാദിക്കുകയും ഉള്ളില്‍ ഇത്തരം പുത്തനാശയക്കാരോട് അനുകൂലനിലപാട് സ്വീകരിക്കുകകയുംചെയ്തത് സംഘടനാ തലത്തില്‍ പുതിയ വിവാദത്തിന് തിരികൊളുത്തിയിരിക്കുകയാണ്.