തിരുവനന്തപുരം: കുടിവെള്ള പദ്ധതിയില്‍ ലക്ഷങ്ങളുടെ നഷ്ടം വരുത്തിയെന്ന് കണ്ടെത്തിയതിനെ തുടര്‍ന്ന് വാട്ടര്‍ അതോറിറ്റി മുന്‍ അസി. എന്‍ജിനീയറെയും മുന്‍ അസി. എക്‌സിക്യൂട്ടീവ് എന്‍ജിനിയറെയും തിരുവനന്തപുരം വിജിലന്‍സ് കോടതി രണ്ട് വര്‍ഷം കഠിനതടവിന് ശിക്ഷിച്ചു.
വാട്ടര്‍ അതോറിറ്റി ശാസ്താംകോട്ട വേള്‍ഡ് ബാങ്ക് പ്രോജക്ട് സെക്ഷനിലെ മുന്‍ അസി. എന്‍ജിനീയര്‍ ഷാഹുല്‍ ഹമീദ് കുഞ്ഞ്, മുന്‍ അസി. എക്‌സിക്യൂട്ടീവ് എന്‍ജിനീയര്‍ ജനാര്‍ദ്ദനന്‍ പിള്ള എന്നിവര്‍ക്കാണ് ശിക്ഷ വിധിച്ചത്.
രണ്ട് വര്‍ഷം വീതം കഠിനതടവിന് പുറമെ 10,000 രൂപ വീതം പിഴയും അടക്കണം. ശാസ്താംകോട്ടയില്‍ 1988മുതല്‍ 1993മാര്‍ച്ച് വരെ നടപ്പാക്കിയ കുടിവെള്ള പദ്ധതിയിലെ ക്രമക്കേടുകളാണ് കേസിനിടയാക്കിയത്.
ശാസ്താംകോട്ട മുതല്‍ ചവറ വരെ 750 എം.എമ്മിന്റെ കാസ്റ്റ് അയണ്‍ പൈപ്പ് സ്ഥാപിക്കുന്നതിന് എസ്റ്റിമേറ്റ് തുക കൂടാതെ അഡിഷണല്‍ എസ്റ്റിമേറ്റ് തയാറാക്കിയ ഇവര്‍, പൊതുമരാമത്ത് നിരക്കിനേക്കാള്‍ അമിതതുക രേഖപ്പെടുത്തി സര്‍ക്കാരിന് 3,26,355 രൂപയുടെ നഷ്ടം വരുത്തിയെന്നാണ് കേസ്.
ഇത് കരാറുകാരന് അമിത ലാഭമുണ്ടാക്കാനിടയാക്കിയെന്നാണ് വിജിലന്‍സ് കേസ്. കൊല്ലം വിജിലന്‍സ് യൂനിറ്റ് മുന്‍ ഡിവൈ.എസ്.പി ജയശാന്തിലാല്‍ റാമാണ് അന്വേഷണം പൂര്‍ത്തിയാക്കി കുറ്റപത്രം സമര്‍പ്പിച്ചത്.
വിജിലന്‍സിന് വേണ്ടി അഡീഷണല്‍ ലീഗല്‍ അഡൈ്വസര്‍ ബിജു മനോഹര്‍ ഹാജരായി.