കൊണ്ടോട്ടി: ഓണം, ബലിപെരുന്നാള്‍ തിരക്ക് മുന്‍നിര്‍ത്തി ഗള്‍ഫ് മേഖലകളിലേക്കും തിരിച്ചും അധിക സര്‍വിസ് നടത്താനൊരുങ്ങി വിമാന കമ്പനികള്‍. പതിവ് സര്‍വിസിനു പുറമെ തിരക്കുള്ള സെക്ടറില്‍ പ്രത്യേക സര്‍വിസ് നടത്തും.
എയര്‍ഇന്ത്യ എക്‌സ്പ്രസ് ടിക്കറ്റ് ബുക്കിങ് തുടങ്ങിയിട്ടുണ്ട്. ജെറ്റ് എയര്‍വെയ്‌സ്, ഇത്തിഹാദ്, ഇന്‍ഡിഗോ വിമാനങ്ങളും പ്രത്യേക സര്‍വിസിന് ശ്രമം തുടങ്ങി.
കരിപ്പൂരില്‍ നിന്ന് ഷാര്‍ജയിലേക്കും റിയാദിലേക്കുമാണ് എയര്‍ഇന്ത്യ എക്‌സ്പ്രസിന്റെ അഡിഷനല്‍ സര്‍വിസുള്ളത്. ഈ മാസം 23, 24, 30, 31, സെപ്റ്റംബര്‍ ഒന്ന്, രണ്ട് തിയതികളിലാണ് ഷാര്‍ജയില്‍ നിന്ന് കരിപ്പൂരിലേക്കുള്ള അഡിഷനല്‍ സര്‍വിസ്.
ഓഗസ്റ്റ് 24, 25, 31, സെപ്റ്റംബര്‍ രണ്ട്, നാല് തിയതികളില്‍ കരിപ്പൂരില്‍ നിന്ന് ഷാര്‍ജയിലേക്കും സര്‍വിസുണ്ട്. ഇതില്‍ ഓഗസ്റ്റ് 31, സെപ്റ്റംബര്‍ രണ്ട് തിയതികളില്‍ രണ്ട് സര്‍വിസുകളാണ് നടത്തുക. റിയാദ്-കരിപ്പൂര്‍ മേഖലകളില്‍ ഓഗസ്റ്റ് 31നാണ് അഡിഷനല്‍ സര്‍വിസുണ്ടാവുക.
കരിപ്പൂരിനുപുറമെ കൊച്ചി, തിരുവനന്തപുരം വിമാനത്താവളങ്ങളില്‍ നിന്ന് എയര്‍ഇന്ത്യ എക്‌സ്പ്രസ് അഡിഷനലായി സര്‍വിസ് നടത്തുന്നുണ്ട്. ഈ മാസം 25, 31, സെപ്റ്റംബര്‍ രണ്ട് ദിവസങ്ങളിലാണ് ഷാര്‍ജ-കൊച്ചി സര്‍വിസുകള്‍. തിരിച്ച് ഓഗസ്റ്റ് 25, സെപ്റ്റംബര്‍ ഒന്ന്, മൂന്ന് തിയതികളില്‍ കൊച്ചിയില്‍ നിന്ന് ഷാര്‍ജയിലേക്കും സര്‍വിസുകളുണ്ടാകും.
ഷാര്‍ജ-തിരുവനന്തപുരം സര്‍വിസ് ഓഗസ്റ്റ് 22, 23, 24, 25, 29, 30, സെപ്റ്റംബര്‍ ഒന്ന്, മൂന്ന് തിയതികളിലാണ് നിശ്ചയിച്ചിരിക്കുന്നത്. തിരിച്ച് തിരുവനന്തപുരം-ഷാര്‍ജ സര്‍വിസ് ഓഗസ്റ്റ് 23, 24, 26, 30, സെപ്റ്റംബര്‍ ഒന്ന്, മൂന്ന് തിയതികളിലുമുണ്ടാകും. ഇതില്‍ ഓഗസ്റ്റ് 23, 30 തിയതികളില്‍ രണ്ട് വിമാനങ്ങളാണ് അഡിഷനല്‍ സര്‍വിസ് നടത്തുക.