ന്യൂഡല്‍ഹി: മധ്യപ്രദേശ്, രാജസ്ഥാന്‍, ചത്തീസ്ഖഡ് നിയമസഭാ തെരഞ്ഞെടുപ്പുകളിലേറ്റ കനത്ത തിരിച്ചടിക്കു പിന്നാലെ ജാര്‍ഖണ്ഡില്‍ നടന്ന നിയമസഭാ ഉപതെരഞ്ഞെടുപ്പിലും ബി.ജെ.പിക്ക് തോല്‍വി.

ജാര്‍ഖണ്ഡിലെ കൊലെബിര മണ്ഡലത്തില്‍ നടന്ന ഉപതെരഞ്ഞെടുപ്പില്‍ കോണ്‍ഗ്രസ് സ്ഥാനാര്‍ഥി നമന്‍ വിക്‌സല്‍ കൊംഗഡി ബി.ജെ.പിയുടെ ബസന്ത് സോറംഗിനെ പരാജയപ്പെടുത്തി. 9658 വോട്ടുകള്‍ക്കായിരുന്നു നമന്‍ വിക്‌സലിന്റെ ജയം.

മണ്ഡലത്തിലെ എം.എല്‍.എയായിരുന്ന എനോസ് ഏക്ക കൊലപാതകക്കുറ്റത്തിന് ശിക്ഷിക്കപ്പെട്ടതിനാലാണ് ഉപതെരഞ്ഞെടുപ്പിന് വഴിയൊരുങ്ങിയത്. ജാര്‍ഖണ്ഡ് പാര്‍ടി (ജെ.കെ.പി) നേതാവായിരുന്നു എനോസ്.

തെരഞ്ഞെടുപ്പില്‍ ജാര്‍ഖണ്ഡ് മുക്തിമോര്‍ച്ച (ജെ.എം.എം) ഒഴികെയുള്ള എല്ലാ പ്രതിപക്ഷ പാര്‍ട്ടികളും കോണ്‍ഗ്രസിനെ പിന്തുണയ്ക്കുന്നുണ്ട്. അഞ്ചു സ്ഥാനാര്‍ഥികളാണ് മണ്ഡലത്തില്‍ മത്സരിച്ചത്.