കിളിമാനൂര്‍: പള്ളിക്കല്‍ വില്ലേജിലെ കല്ലടത്തണ്ണി മിച്ചഭൂമിയില്‍ ഭൂമി അളന്ന് കല്ലിട്ട് തിരിക്കല്‍ അവസാനഘട്ടത്തിലേക്ക്. കല്ലടത്തണി വല്ലഭന്‍കോട്ടെ 14 ഏക്കര്‍ 89 സെന്റ് സര്‍ക്കാര്‍ ഭൂമിയാണ് അളന്നു തിരിക്കുന്നത്. ഭൂമിയുടെ സര്‍വേ നടപടികള്‍ ഇതിനകം പൂര്‍ത്തിയാക്കി. ഭൂമി മൂന്ന് സെന്റ് വീതമുള്ള പ്ലോട്ടുകളായി തിരിച്ച് കല്ലിടുന്ന ജോലി പുരോഗമിക്കുന്നു. വി.ജോയി എം.എല്‍.എയുടെ നേതൃത്വത്തിലാണ് നടപടികള്‍ .
98 പ്ലോട്ടുകളായാണ് ഭൂമി അളന്ന് തിരിക്കേണ്ടത്. വര്‍ക്കല തഹസീല്‍ദാര്‍ രാജു ഡെപ്യൂട്ടി തഹസീല്‍ദാര്‍ ഷാജി എന്നിവരുടെ നേതൃത്വത്തിലുള്ള റവന്യൂസംഘമാണ് കല്ലിടല്‍ നടത്തുന്നത്. നിലവില്‍ പള്ളിക്കല്‍ പഞ്ചായത്ത് പരിധിയില്‍ തന്നെ ഭൂരഹിതരില്ലാത്ത കേരളം പദ്ധതിയില്‍ അപേക്ഷകരായി 79 പേര്‍ ഉണ്ട്. ഇവരില്‍ അര്‍ഹരായവര്‍ക്കും, ചെങ്ങറ സമരത്തില്‍ പങ്കെടുത്ത അര്‍ഹരായവര്‍ക്കും സര്‍ക്കാര്‍ നിര്‍ദ്ദേശം ലഭിക്കുന്ന മുറക്ക് പട്ടയം നല്‍കാനുള്ള നടപടികള്‍ സ്വീകരിക്കുമെന്ന് തഹസീല്‍ദാര്‍ എന്‍. രാജു പറഞ്ഞു.
പട്ടയവിതരണം സര്‍ക്കാരിന്റെ നയപരമായ തീരുമാനമാണെന്നും നിലവിലുള്ള നിയമത്തിന്റെയും മാനദണ്ഡത്തിന്റെയും അടിസ്ഥാനത്തില്‍ അര്‍ഹരായ ഗുണഭോക്താക്കളെ കണ്ടെത്തുമെന്നും അദ്ദേഹം അറിയിച്ചു. ഭൂമി അര്‍ഹര്‍ക്ക് വീതിച്ചുനല്‍കുന്ന നടപടികള്‍ അവസാനഘട്ടത്തിലാണെന്നും വിഷയം മന്ത്രസഭയുടെ ശ്രദ്ധയില്‍ പെടുത്തിയതായു സ്ഥലം സന്ദര്‍ശിച്ച വി.ജോയി എം.എല്‍.എയും പറഞ്ഞു. പള്ളിക്കല്‍ പഞ്ചായത്ത് പ്രസിഡന്റ് അടുക്കൂര്‍ ഉണ്ണി, പഞ്ചായത്ത് സ്ഥിരംസമിതി അധ്യക്ഷന്‍മാരായ നാസര്‍ഖാന്‍, അബുത്താലിബ് എന്നിവരും എം.എല്‍.എക്കൊപ്പം ഉണ്ടായിരുന്നു.