വട്ടിയൂര്‍ക്കാവ്: സെന്‍ട്രല്‍ പോളിടെക്‌നിക്കിലെ ഇരുബ്രാഞ്ചുകള്‍ തമ്മില്‍ തുടരുന്ന സംഘര്‍ഷം കൈയാങ്കളിയിലേക്ക് നീങ്ങിയതോടെ കോളജ് അടച്ചു. അനിശ്ചിതകാലത്തേക്കാണ് കോളജ് അടച്ചത്. മെക്കാനിക്കല്‍, ഇലക്ട്രോണിക് വിഭാഗങ്ങള്‍ തമ്മിലുള്ള പ്രശ്‌നങ്ങള്‍ പരിഹരിക്കാനാവാത്ത വിധം തുടരുന്നതാണ് കോളജിന് താല്‍ക്കാലികമായി താഴിടാന്‍ കാരണം.
ഇരു ബ്രാഞ്ചുകളിലെ വിദ്യാര്‍ഥികള്‍ തമ്മില്‍ നേരത്തേ തന്നെ പ്രശ്‌നങ്ങളുണ്ടായിരുന്നു. വിദ്യാര്‍ഥികള്‍ തമ്മിലുള്ള അടി നവമാധ്യമങ്ങളിലൂടെ പ്രചരിപ്പിക്കുകയും ചെയ്തു. ഇരു ബ്രാഞ്ചുകളിലേയും അവസാനവര്‍ഷ വിദ്യാര്‍ഥികളും ഒന്നാം വര്‍ഷ വിദ്യാര്‍ഥികളും ചേര്‍ന്നായിരുന്നു അക്രമങ്ങള്‍ നടത്തിയത്. ഇതേത്തുടര്‍ന്ന് അവസാനവര്‍ഷ വിദ്യാര്‍ഥികളെയെല്ലാം താഴെയും ആദ്യവര്‍ഷ വിദ്യാര്‍ഥികളെയെല്ലാം മുകള്‍ നിലയിലുമാക്കി. സീനിയേഴ്‌സ ജൂനിയേഴ്‌സിനെ കാണുന്നതും വിലക്കി. ഇത് ഇരു ബ്രാഞ്ചുകളും അംഗീകരിച്ചില്ല. പഴയപോലെ ഒരുമിച്ചാക്കണമെന്നാണ് വിദ്യാര്‍ഥികളുടെ ആവശ്യം. ഇത് കോളജ് അധികൃതര്‍ അനുവദിക്കാത്തതാണ് വിദ്യാര്‍ഥി പ്രതിഷേധത്തിന് കാരണം. അവധിയിലായിരിക്കുന്ന പ്രിന്‍സിപ്പല്‍ തിങ്കളാഴ്ച സ്ഥലത്തെത്തിയ ശേഷം വേണ്ടുന്ന നടപടി സ്വീകരിക്കുമെന്ന് കോളജ് അധികൃതര്‍ പറഞ്ഞു. രക്ഷകര്‍ത്താക്കളെക്കൂടി ഉള്‍പ്പെടുത്തി പ്രശ്‌നപരിഹാരം നടത്താനാണ് കോളജ് അധികൃതര്‍ ലക്ഷ്യമിടുന്നത്.