തിരുവനന്തപുരം: ആക്രമിക്കപ്പെട്ട നടിയെക്കുറിച്ച് അപകീര്‍ത്തികരമായ പരാമര്‍ശം നടത്തിയതിന് കേസെടുക്കാനുള്ള വനിതാ കമ്മിഷന്‍ നീക്കത്തെ പരിഹസിച്ച് പി.സി ജോര്‍ജ് എം.എല്‍.എ. വനിതാ കമ്മിഷനെന്നു കേട്ടാല്‍ ഭയങ്കര പേടിയാണെന്നും അല്‍പ്പം ഉള്ളി കിട്ടിയാല്‍ കരയാമായിരുന്നെന്നും പരിഹാസരൂപേണ അദ്ദേഹം പ്രതികരിച്ചു. അവരാദ്യം വനിതകളുടെ കാര്യമാണു നോക്കേണ്ടതെന്നും നല്ല കാര്യങ്ങളൊക്കെ ചെയ്തിട്ടു വന്നാല്‍ താനും ഒപ്പം കൂടുമെന്നും പി.സി ജോര്‍ജ് പറഞ്ഞു.
ആദ്യം മട്ടന്നൂര്‍ പട്ടികജാതിയില്‍പ്പെട്ട സ്ത്രീയെ മര്‍ദിച്ച മന്ത്രിയുടെ ഭര്‍ത്താവിനെതിരേ വനിതാ കമ്മിഷന്‍ കേസെടുക്കണം. അതുകഴിഞ്ഞ് കോട്ടയത്തെ ആശുപത്രിയില്‍ സമരം ചെയ്യുന്ന നഴ്‌സുമാര്‍ക്കു മുന്നില്‍ പാന്റിന്റെ സിബ്ബൂരി അപമാനിച്ച മാനേജ്‌മെന്റിന്റെ പിണിയാള്‍ക്കെതിരേ കേസെടുക്കണം. അങ്ങനെ നല്ല കാര്യങ്ങളൊക്കെ ചെയ്തിട്ട് ഇങ്ങോട്ടു വന്നാല്‍ താനും കൂടാമെന്നും അല്ലാതെ തന്റെ മൂക്കു ചെത്താന്‍ ഇങ്ങോട്ടു വരേണ്ടെന്നും പി.സി ജോര്‍ജ് പറഞ്ഞു.