മനാമ: ഭിന്നശേഷിയുള്ള കുട്ടികളുടെ സംരക്ഷണത്തിനും ഗവേഷണത്തിനുമായി പ്രവര്‍ത്തിക്കുന്ന നെസ്റ്റ് ഇന്റര്‍നാഷണല്‍ അക്കാദമി ആന്‍ഡ് റിസര്‍ച്ച് സെന്ററി (നിയാര്‍ക്ക്)ന്റെ ബഹ്‌റൈന്‍ ചാപ്റ്റര്‍ കുടുംബസംഗമം നടത്തി. ക്രിസ്തുമസ് പുതുവല്‍സര ആഘോഷത്തോടൊപ്പം, ഇന്ത്യന്‍ സ്‌കൂള്‍ മെഗാഫയറിന്റെ ഭാഗമായി നിയാര്‍ക്ക് വനിതാവിഭാഗം 'പിരിശപ്പത്തിരി' എന്ന പേരില്‍ ഒരുക്കിയ ഭക്ഷണ സ്റ്റാളിന്റെ വിജയവും ആഘോഷിക്കുവാനായി സിഞ്ചിലെ ഫ്രണ്ട്‌സ് സോഷ്യല്‍ അസോസിയേഷന്‍ ഹാളില്‍ വനിതാ വിഭാഗത്തിന്റെ നേതൃത്വത്തില്‍ ചേര്‍ന്ന കുടുംബസംഗമത്തില്‍ മിനി മാത്യു അധ്യക്ഷയായിരുന്നു. ഷംസീറ ഷമീര്‍, ആബിദ ഹനീഫ് ,ആയിഷ ജാസ്മിന്‍, നദീറ മുനീര്‍, ജെസി കെ. ജലീല്‍ എന്നിവര്‍ പ്രവര്‍ത്തനങ്ങളുടെ അവലോകനം നടത്തി.

നിയാര്‍ക്ക് ഭാരവാഹികളായ കെ.ടി സലിം, ടി. പി. നൗഷാദ്, ഫാറൂഖ് കെ.കെ, ഹനീഫ് കടലൂര്‍, ഇല്യാസ് കൈനോത്ത് എന്നിവര്‍ ആശംസകള്‍ നേര്‍ന്നു. ഫെബ്രുവരി എട്ടിന് പ്രൊഫ: ഗോപിനാഥ് മുതുകാട് ബഹ്‌റൈന്‍ കേരളീയസമാജത്തില്‍, നിയാര്‍ക്കിനുവേണ്ടി നടത്താന്‍ പോകുന്ന 'എംക്യൂബ്' പരിപാടിയുടെ വിജയത്തിനായി വിവിധ പദ്ധതികള്‍ യോഗത്തില്‍ വെച്ച് തയ്യാറാക്കി.