ഉരുവച്ചാല്‍: നെല്ലൂന്നിയില്‍ സി. പി.എം പ്രവര്‍ത്തകന്റെ കാര്‍ അടിച്ചു തകര്‍ത്തു. മട്ടന്നൂര്‍ അക്ഷര ആര്‍ട്‌സ് സ്ഥാപന ഉടമയായ പി.പി ഷാജിയുടെ കാറാണ് ഇന്നലെ പുലര്‍ച്ചെയോടെ തകര്‍ത്തത്. വീടിന്റെ പോര്‍ച്ചില്‍ നിര്‍ത്തിയിട്ട കാര്‍ തകര്‍ക്കുന്ന ശബ്ദം കേട്ട് വീട്ടുകാര്‍ ഉണര്‍ന്നെകിലും അക്രമികള്‍ രക്ഷപ്പെട്ടു. സമാധാനം നിലനില്‍ക്കുന്ന നെല്ലൂന്നിയില്‍ സംഘര്‍ഷമുണ്ടാക്കാനുള്ള ബോധപൂര്‍വമായ ശ്രമമാണെന്നും പിന്നില്‍ ആര്‍.എസ്.എസ് പ്രവര്‍ത്തകരാണെന്നും സി.പി.എം ആരോപിച്ചു. കഴിഞ്ഞദിവസം ആര്‍.എസ്.എസ് നെല്ലൂന്നി ശാഖ മുഖ്യശിക്ഷക് ശരത്തിന്റെ ഓട്ടോയ്ക്ക് നേരെ അക്രമം നടന്നിരുന്നു. സംഭവത്തെ തുടര്‍ന്ന് മട്ടന്നൂര്‍ പൊലിസ് സ്റ്റേഷനില്‍ രാഷ്ട്രീയ പാര്‍ട്ടി പ്രതിനിധികളുടെ യോഗം ചേര്‍ന്നതിന് പിന്നാലെയാണ് കാര്‍ ആക്രമിച്ചത്. മട്ടന്നൂര്‍ പൊലിസ് സ്ഥലത്തെത്തി അന്വേഷണം നടത്തി.