ജലീല്‍ അരൂക്കുറ്റി#

കൊച്ചി: കേരള പ്രീമിയര്‍ ലീഗ് ഫുട്‌ബോളില്‍ ഗോള്‍ മഴ പെയ്യിച്ച് എഫ്.സി കേരള തൃശൂര്‍. എറണാകുളം അംബേദ്കര്‍ സ്റ്റേഡിയത്തില്‍ നടന്ന ഗ്രൂപ്പ് ബി മത്സരത്തില്‍ എഫ്.സി 7-1ന് ആതിഥേയരായ ഗോള്‍ഡന്‍ ത്രെഡ്‌സ് എഫ്.സിയെ പരാജയപ്പെടുത്തി.
തിരുവനന്തപുരത്ത് നടന്ന ആദ്യ മത്സരത്തില്‍ കോവളം എഫ്.സിക്കെതിരേ നേടിയ വിജയത്തിന്റെ ആവേശവുമായി ഹോം ഗ്രൗണ്ടിലെ ആദ്യ അങ്കത്തിന് ഇറങ്ങിയ ഗോള്‍ഡന്‍ ത്രെഡ്‌സ് ഏറ്റുവാങ്ങിയത് കനത്ത പ്രഹരം. എഫ്.സി കേരളക്കായി വിക്ടര്‍ എക്കോബോമോങ് (13, 35), ഉസ്മാന്‍ സയ്യിദ് (50,77) എന്നിവര്‍ ഇരട്ടഗോളുകള്‍ നേടി.

രാജു സുഹൈല്‍ ( 54) ജിസ് ജീസസ് ( 89) എന്നിവര്‍ ഓരോ ഗോള്‍വീതം നേടി. 40 ാംമിനുട്ടില്‍ നിംഷാദ് റോഷനാണ് ഗോല്‍ഡന്‍ ത്രെഡ്‌സിനായി ആശ്വാസ ഗോള്‍ കണ്ടെത്തിയത്.
ത്രെഡ്‌സ് താരം നിഖില്‍ 86 ാംമിനുട്ടില്‍ സ്വന്തം പോസ്റ്റിലേക്ക് പന്തടിച്ചു കയറ്റി എഫ്.സി കേരളയ്ക്കു ആറാം ഗോള്‍ സമ്മാനിച്ചു. ഇതിനു പിന്നാലെയായിരുന്നു ജിസ് ജീസസിന്റെ വക എഫ്.സി കേരളയുടെ ഏഴാം ഗോള്‍.

ആറ് ഗോളുകളാണ് രണ്ടാം പകുതിയില്‍ മാത്രം പിറന്നത്. അഞ്ചെണ്ണം ത്രെഡ്‌സിന്റെ വലയില്‍ കയറി. സ്വന്തം മൈതാനത്ത് ഏല്‍ക്കേണ്ടി വന്ന വമ്പന്‍ തോല്‍വി ഗോള്‍ഡന്‍ ത്രെഡ്‌സിനു കനത്ത ആഘാതമായി. കഴിഞ്ഞ സീസണില്‍ പ്രീമിയര്‍ ലീഗില്‍ പ്രതീക്ഷയ്‌ക്കൊത്ത് ഉയരാനാവാതെ പോയ എഫ്.സി കേരള ഇത്തവണ മികച്ച തുടക്കമാണ് കുറിച്ചത്.