തിരുവനന്തപുരം: ട്രാഫിക് നിയമലംഘനം നടത്തിയതിന് നോട്ടിസ് ലഭിച്ചിട്ടും പിഴയടക്കാത്തവര്‍ക്കെതിരേ മോട്ടോര്‍ വാഹന വകുപ്പ് നിയമ നടപടിക്കൊരുങ്ങുന്നു. പുതുവര്‍ഷത്തില്‍ ഇവര്‍ക്കെതിരേ നിയമ നടപടിയുമായി മുന്നോട്ടു പോകാനുള്ള നിര്‍ദേശങ്ങള്‍ റീജ്യനല്‍ ട്രാന്‍സ്‌പോര്‍ട്ട് ഓഫിസര്‍മാര്‍ക്ക് ഗതാഗത വകുപ്പ് നല്‍കിക്കഴിഞ്ഞു. നിയമം ലംഘിച്ചതിന് പിഴയടക്കണമെന്ന് കാണിച്ച് ട്രാഫിക് പൊലിസ് നല്‍കിയ നോട്ടിസിനെ വകവയ്ക്കാത്തവരുടെ എണ്ണം വന്‍തോതില്‍ വര്‍ധിക്കുന്ന സാഹചര്യത്തിലാണ് വകുപ്പിന്റെ പുതിയ തീരുമാനം.
മോട്ടോര്‍ വാഹന വകുപ്പിന്റെ കണക്കനുസരിച്ച് കഴിഞ്ഞ അഞ്ചുവര്‍ഷത്തിനിടെ ഏഴര ലക്ഷത്തിലധികം പേര്‍ക്ക് നോട്ടിസ് ലഭിച്ചിട്ടും പിഴയടച്ചിട്ടില്ല. കൂടാതെ ഇവര്‍ പിന്നീടും നിയമലംഘനം നടത്തിയതായി വകുപ്പ് കണ്ടെത്തിയിട്ടുണ്ട്. ഈ സാഹചര്യത്തില്‍ അഞ്ചു തവണയില്‍ കൂടുതല്‍ ട്രാഫിക് നിയമം ലംഘിച്ച് പിഴചുമത്തപ്പെട്ടവരുടെ പേരിലാകും ആദ്യഘട്ടത്തില്‍ നിയമനടപടി സ്വീകരിക്കുക. ഇതിന്റെ ആദ്യപടിയെന്ന നിലയില്‍ ജനുവരി ആദ്യംതന്നെ ഈ ഗണത്തില്‍പ്പെട്ട വാഹന ഉടമകള്‍ക്ക് മറ്റൊരു നോട്ടിസ് കൂടി അയക്കും. ഇതിനെ തുടര്‍ന്നും പ്രതികരണം ഉണ്ടാകുന്നില്ലെങ്കില്‍ നിയമനടപടികളിലേക്കു നീങ്ങും.
മോട്ടോര്‍ വാഹന ഉടമകള്‍ പിഴ അടക്കാതിരിക്കുന്നതിലൂടെ സംസ്ഥാനത്തിന് 30.94 കോടി രൂപയുടെ നഷ്ടമുണ്ടെന്നാണ് കണക്ക്. ട്രാഫിക് നിയമ ലംഘകരില്‍നിന്ന് കഴിഞ്ഞവര്‍ഷം 2.2 കോടി രൂപ പിഴയായി സര്‍ക്കാരിന് ലഭിച്ചപ്പോള്‍ 8.9 കോടി രൂപയാണ് പിഴ ചുമത്തിയിട്ടും കിട്ടാതെപോയത്. ഈ കണക്ക് വന്‍തോതില്‍ വര്‍ധിക്കുന്ന സാഹചര്യത്തിലാണ് പുതിയ നടപടി.
നേരത്തെ പോണ്ടിച്ചേരിയില്‍ നികുതി കുറച്ച് രജിസ്റ്റര്‍ ചെയ്തിരുന്ന ആഡംബര വാഹനങ്ങള്‍ പിടിച്ചെടുത്ത് പിഴ ചുമത്തുന്ന നടപടികള്‍ മോട്ടോര്‍ വാഹന വകുപ്പ് സ്വീകരിച്ചിരുന്നു. ഈ നടപടി ഏതാണ്ട് നിശ്ചലമായ അവസ്ഥയിലാണ്. നടനും ബി.ജെ.പി എം.പിയുമായ സുരേഷ് ഗോപിയുടെ ആഡംബര വാഹനത്തിന്റെ രജിസ്‌ട്രേഷന്‍ പോണ്ടിച്ചേരിയില്‍ വ്യാജ വിലാസത്തിലാണെന്ന് കണ്ടെത്തിയിട്ടും പിഴയടച്ചിരുന്നില്ല.
സുരേഷ് ഗോപിക്കെതിരേ നിയമനടപടിക്ക് മോട്ടോര്‍ വാഹന വകുപ്പ് ഒരുങ്ങിയെങ്കിലും ഇതുവരെ അക്കാര്യത്തില്‍ ഒരു പുരോഗതിയും ഉണ്ടായില്ല. ഈ സാഹചര്യത്തിലാണ് പിഴയടക്കാത്ത നിയമ ലംഘകര്‍ക്കെതിരേ നിയമനടപടിക്ക് വകുപ്പ് ഒരുങ്ങുന്നത്.