കല്‍പ്പറ്റ: നീതിതേടി കാഞ്ഞിരത്തിനാല്‍ ജെയിംസും കുടുംബവും കലക്ടറേറ്റ് പടിക്കല്‍ നടത്തുന്ന ഉപവാസസമരം ഇന്ന് രണ്ടുവര്‍ഷം തികഞ്ഞു.
രോഗിയായ കുടുംബനാഥനും ഭാര്യയും സ്‌കൂള്‍ വിദ്യാര്‍ഥികളായ രണ്ടു മക്കളും ജില്ലാ ഭരണകൂടത്തിന്റെ മൂക്കിനുതാഴെ സമരം തുടരുമ്പോഴും രണ്ടു വര്‍ഷമായി ഇവര്‍ക്കനുകൂലമായ തീരുമാനങ്ങളൊന്നുമായിട്ടില്ല.
ഇതെതുടര്‍ന്ന് സമരം കൂടുതല്‍ ശക്തമാക്കുന്നതിന്റെ ഭാഗമായി കാഞ്ഞിരത്തിനാല്‍ സമരസഹായസമിതി ഭാരവാഹികള്‍ കലക്ടറേറ്റ് പടിക്കല്‍ രാപ്പകല്‍ സമരം ആരംഭിച്ചു.
ഇന്നലെ ഉച്ചക്ക് 12ഓടെയാണ് സമരം ആരംഭിച്ചത്. ഇന്ന് ഉച്ചക്ക് 12ന് സമരം സമാപിക്കും. സമാപന ചടങ്ങില്‍ മുന്‍കേന്ദ്രമന്ത്രി പി.സി തോമസ് പങ്കെടുക്കും.
കെ.സി.വൈ.എം രൂപത ഡയറക്ടര്‍ ഫാദര്‍ ലാല്‍ ജേക്കബ് സമരം ഉദ്ഘാടനം ചെയ്തു.
സുരേഷ് ബാബു അധ്യക്ഷനായി. തോമസ് അമ്പലവയല്‍, സാലി റാട്ടക്കൊല്ലി എന്നിവര്‍ മുഖ്യപ്രഭാഷണം നടത്തി. പി.പി ഷൈജല്‍, പി.ടി പ്രേമാനന്ദന്‍, വി.എസ് ജോസഫ്, ലാല്‍ജി ശര്‍മ്മ, സുദീര്‍ കുമാര്‍ സംസാരിച്ചു.
ഭരണകൂടത്തിന്റെ ഭാഗത്തുനിന്ന് അനുകൂലമായ നിലപാടല്ല സമരത്തിന് നേരെയുള്ളതെന്ന് സംഗമം ആരോപിച്ചു.
കാഞ്ഞിരത്തിനാല്‍ ജെയിംസും കുടുംബവും എങ്ങനെ ജീവിച്ചുപോകുന്നുവെന്നും കുട്ടികളുടെ പഠനം ഏതുവിധം മുന്നോട്ടുപോകുന്നുവെന്നും ജില്ലയിലെ എം.പിയും എം.എല്‍.എമാരും ജില്ലാ ഭരണകൂടവും അടക്കമുള്ളവര്‍ ഒന്നന്വേഷിക്കുക പോലും ചെയ്യുന്നില്ലെന്നും അവര്‍ ആരോപിച്ചു.
ഉദ്യോഗസ്ഥ മേധാവിത്വത്തിന് പിന്തുണ കൊടുക്കുന്ന നിലപാടാണ് ഭരണകൂടത്തിന്റേതെന്നും കോടതിയില്‍ പ്രതീക്ഷയര്‍പ്പിക്കുകയാണ് തങ്ങള്‍ ഇനിയെന്നും ഭാരവാഹികള്‍ പറഞ്ഞു. കഴിഞ്ഞ ബുധനാഴ്ച കോടതി പരിഗണിക്കേണ്ട കേസ് വീണ്ടും മാറ്റിവെച്ചിരിക്കുകയാണെന്നും ഭാരവാഹികള്‍ പറഞ്ഞു.