ചാലക്കുടി: റബര്‍തോട്ടത്തിലെ കമ്പിവേലിയില്‍ കുടുങ്ങിയ പുള്ളിപ്പുലിയെ മയക്കുവെടിവച്ചു വീഴ്ത്തിയ ശേഷം കോടനാട്ടെ റസ്‌ക്യൂ സെന്ററിലേക്കു മാറ്റി. വെറ്റിലപ്പാറ മുണ്ടന്‍മാണി ജങ്ഷന് സമീപത്തെ റബര്‍തോട്ടത്തില്‍ മരങ്ങള്‍ക്കിടയില്‍ സ്ഥാപിച്ച കമ്പിവേലിയിലാണ് കഴിഞ്ഞദിവസം പുലി കുടുങ്ങിയത്. രാവിലെ പട്ടികള്‍ നിര്‍ത്താതെ കുരയ്ക്കുന്നതു കേട്ട് പ്രദേശവാസികള്‍ നോക്കിയപ്പോഴാണ് വേലിയില്‍ കുരുങ്ങിയ നിലയില്‍ പുലിയെ കണ്ടത്. കഴുത്തിലും ദേഹത്തും കമ്പികള്‍ ചുറ്റിയത് മൂലം അനങ്ങാന്‍ കഴിയാത്ത നിലയിലായിരുന്നു. വിവരമറിഞ്ഞെത്തിയ വനപാലകര്‍ പുലിയുടെ ദേഹത്ത് നിന്ന് കുരുക്ക് മാറ്റാന്‍ ശ്രമിച്ചെങ്കിലും വിഫലമായി. തുടര്‍ന്ന് മയക്കുവെടിവച്ച് പുലിയെ വീഴ്ത്തിയ ശേഷം പ്രത്യേക കൂട്ടിലേക്ക് മാറ്റുകയായിരുന്നു. മുറിവുകള്‍ ചികിത്സിച്ച് ഭേദമാക്കിയ ശേഷം പുലിയെ ഉള്‍വനത്തിലേക്ക് തിരിച്ചയക്കുമെന്ന് വനപാലകര്‍ വ്യക്തമാക്കി.