ഹൈദരാബാദ്: ഓടുന്ന കാറില്‍ നടിയെ പീഡിപ്പിക്കാന്‍ ശ്രമിച്ച സംഭവത്തില്‍ സംവിധായകന്‍ അറസ്റ്റില്‍. പുതുമുഖ നടിയെയാണ് പീഡിപ്പിക്കാന്‍ ശ്രമിച്ചത്. സംവിധായകന്‍ തമ്മറെഡ്ഡി ചലപതി റാവുവിനും നടന്‍ സൃജന്‍ ലോകേഷിനുമെതിരേയാണ് പുതുമുഖ നടി പരാതി നല്‍കിയത്. കൊച്ചിയില്‍ പ്രമുഖ നടി ആക്രമിക്കപ്പെട്ടതിന് സമാനമായ സംഭവമാണ് ഹൈദരാബാദിലും ഉണ്ടായത്. ഓഗസ്റ്റ് 13നാണ് യുവതിയെ പീഡിപ്പിക്കാന്‍ ശ്രമിച്ചതെന്നാണ് പരാതിയില്‍ പറയുന്നത്. സിനിമയില്‍ അഭിനയിപ്പിക്കാമെന്നറിയിച്ച് സംവിധായകന്‍ ചലപതിയും നടന്‍ സൃജനും സിനിമയുടെ ചിത്രീകരണം നടക്കുന്ന ഭീമാവാരത്തേക്ക് കാറില്‍ കൂട്ടിക്കൊണ്ടുപോയി. യാത്രക്കിടയിലാണ് പീഡിപ്പിക്കാന്‍ ശ്രമിച്ചതെന്ന് യുവതി പറയുന്നു. ചലപതി റാവുവിനെ പൊലിസ് അറസ്റ്റ് ചെയ്തു. നടന്‍ സൃജന്‍ ഒളിവിലാണ്.