നിലമ്പൂര്‍: ചാലിയാര്‍ പഞ്ചായത്തിലെ കുറുവന്‍ പുഴക്ക് കുറുകെ  പി ഡബ്ലു ഡി നിര്‍മിച്ച പാലത്തിനും അപ്രോച്ച് റോഡിനുമായി സ്ഥലം വിട്ടുനല്‍കിയ ഉടമക്ക് 11 വര്‍ഷം കഴിഞ്ഞിട്ടും നഷ്ടപരിഹാരത്തുക ലഭിച്ചില്ല. ഇടിവണ്ണ സ്വദേശിയായ പൂവത്തിങ്കല്‍ ബേബിക്കാണ് പാലവും ഇതോട് അനുബന്ധിച്ചുള്ള അപ്രോച്ച് റോഡിന്റെയും ഉദ്ഘാടനം കഴിഞ്ഞ് 3 വര്‍ഷമായിട്ടും പണം ലഭിക്കാതിരിക്കുന്നത്. പൊതുമരാമത്ത് വകുപ്പിനെതിരെ നിയമ നടപടി സ്വീകരിക്കുമെന്ന് ബേബി പറഞ്ഞു. 2005ലാണ് മൂലേപ്പാടത്ത് തന്റെ ഉടമസ്ഥതയിലുള്ള ഭൂമിയില്‍ നിന്നും 26സെന്റ് പാലത്തിനായി വിട്ടുനല്‍കിയത്.  
അന്നത്തെ എംഎല്‍എ ആയിരുന്ന ആര്യാടന്‍ മുഹമ്മദ് ആവശ്യപ്പെട്ട പ്രകാരമാണ് ഭൂമി പൊതുമരാമത്ത് വകുപ്പിന് വിട്ടുനല്‍കിയത്.  ഉടന്‍തന്നെ സര്‍ക്കാരില്‍നിന്നും ഭൂമിയുടെ നഷ്ടപരിഹാരത്തുക ലഭ്യമാക്കാമെന്നും ആര്യാടന്‍ ഉറപ്പുനല്‍കിയിരുന്നതായി ഇയാള്‍ പറയുന്നു. ഇത് വിശ്വസിച്ചാണ് സ്ഥലം നല്‍കിയത്. ഇവിടെ കച്ചവടത്തിനായി വാടകക്ക് നല്‍കിയിരുന്ന കെട്ടിടം പൊളിച്ചുമാറ്റിയും കായ്ഫലമുള്ള തെങ്ങുകളും കമുകുകളും വെട്ടിനീക്കിയുമാണ് സ്ഥലം നല്‍കിയത്.
2013ല്‍ പാലവും അപ്രോച്ച് റോഡും ഗതാഗതത്തിനായി തുറന്നുകൊടുക്കുന്ന അവസരത്തില്‍ പണത്തിന്റെ കാര്യം സൂചിപ്പിച്ചപ്പോള്‍ ഉദ്ഘാടനത്തിനുമുന്‍പ് പണം നല്‍കുമെന്ന് ഉറപ്പു നല്‍കിയിരുന്നു. നിലവില്‍ അപ്രോച്ച് റോഡിനും പാലത്തിനുമായി വിട്ടുനല്‍കിയ ഭൂമി തന്റെ പേരില്‍തന്നെയാണ് തന്റെ സമ്മതപത്രം രേഖാമൂലം വാങ്ങാതെയാണ് പൊതുമരാമത്ത് വകുപ്പ് നിര്‍മാണ പ്രവര്‍ത്തികള്‍ നടത്തിയത്. നിയമപരമായ കാര്യങ്ങള്‍ പാലിക്കാതെ തന്റെ ഉടമസ്ഥതയിലുള്ള ഭൂമിയില്‍ നിര്‍മാണ പ്രവൃത്തി നടത്തിയതിന് പൊതുമരാമത്ത് വകുപ്പിനെതിരെ നടപടി സ്വീകരിക്കുമെന്ന് ബേബി പറഞ്ഞു.