കോഴിക്കോട്: പി.എസ്.സി അഡൈ്വസ് മെമ്മോ ലഭിച്ചവരെ പരിഗണിക്കാതെ കെ.എസ്.ആര്‍.ടി.സിയും സര്‍ക്കാരും പിന്‍വാതില്‍ നിയമനത്തിന് ഒത്താശ ചെയ്യുന്നുവെന്നാരോപിച്ച് കെ.എസ്.ആര്‍.ടി.സി റിസര്‍വ് കണ്ടക്ടര്‍ പി.എസ്.സി അഡൈ്വസ്ഡ് റാങ്ക് ഹോള്‍ഡേഴ്‌സ് അസോസിയേഷന്‍ ജില്ലാ കമ്മിറ്റി സിവില്‍ സ്റ്റേഷന് മുന്നില്‍ പ്രതിഷേധ സമരം നടത്തി. തങ്ങള്‍ക്കു കിട്ടിയ അഡൈ്വസ് മെമ്മോയില്‍ കടല പൊതിഞ്ഞായിരുന്നു സമരം.
കെ.എസ്.ആര്‍.ടി.സിയില്‍ 4,263 താല്‍ക്കാലിക കണ്ടക്ടര്‍മാര്‍ ജോലി ചെയ്യുമ്പോഴും പി.എസ്.സി അഡൈ്വസ് ലഭിച്ച റിസര്‍വ് കണ്ടക്ടര്‍ തസ്തികയിലെ ഉദ്യോഗാര്‍ഥികള്‍ക്ക് എട്ടു മാസമായിട്ടും നിയമനം നല്‍കാത്തതില്‍ പ്രതിഷേധിച്ച് അഡൈ്വസ് മെമ്മോയില്‍ കടല പൊതിഞ്ഞു സൗജന്യമായി വില്‍പന നടത്തി. എ.ഐ.വൈ.എഫ് ജില്ലാ സെക്രട്ടറി പി. ഗവാസ് ഉദ്ഘാടനം ചെയ്തു. പിന്‍വാതില്‍ നിയമനം നടത്തി അഡൈ്വസ് കിട്ടിയവരെ വഞ്ചിക്കുന്ന നിലപാട് കെ.എസ്.ആര്‍.ടി.സി അവസാനിപ്പിക്കുക, 4,263 താല്‍കാലിക കണ്ടക്ടര്‍മാരെ പിരിച്ചുവിട്ട് അഡൈ്വസ് കിട്ടിയവര്‍ക്ക് നിയമനം നല്‍കുക എന്നീ മുദ്രാവാക്യങ്ങളെഴുതിയ പ്ലക്കാര്‍ഡുകളും സമരക്കാര്‍ ഉയര്‍ത്തിയിരുന്നു.