പാലാ: അറ്റകുറ്റപ്പണിക്കിടെ പെട്രോള്‍പമ്പില്‍ തീപിടിത്തം. ജീവനക്കാരുടെ സമയോചിത ഇടപെടല്‍മൂലം വന്‍ ദുരന്തമൊഴിവായി. കൊല്ലപ്പള്ളിയിലെ ഇന്ത്യന്‍ ഓയില്‍ കോര്‍പറേഷന്റെ കീഴിലുള്ള പമ്പില്‍ ഇന്നലെ ഉച്ചയ്ക്ക് 12.40-ഓടെയായിരുന്നു സംഭവം.
പെട്രോള്‍ നിറച്ചിരുന്ന ഭൂഗര്‍ഭ ടാങ്ക് അറ്റകുറ്റപ്പണിക്കായി തൊഴിലാളികള്‍ കട്ടര്‍ ഉപയോഗിച്ച് മുറിക്കുന്നതിനിടെ തീപ്പൊരി വീണ് ടാങ്കിന്റെ ചുറ്റും തീപിടിക്കുകയായിരുന്നു.
മൂന്നാള്‍ ഉയരത്തില്‍ തീ പടര്‍ന്നതോടെ പമ്പില്‍ ഡീസല്‍ അടിച്ചുകൊണ്ടിരുന്ന വാഹന ഉടമകള്‍ ഓടി രക്ഷപെട്ടു. ജീവനക്കാര്‍ അഗ്നിശമന യന്ത്രങ്ങളുപയോഗിച്ച് തീ നിയന്ത്രണവിധേയമാക്കി. പെട്രോള്‍ നിറച്ച ടാങ്കിനു ചുറ്റും നിറച്ച മണലിനു മുകളിലാണ് തീ പിടിച്ചത്. ടാങ്കിലേക്ക് തീ പടരാതെ നിയന്ത്രിക്കാനായതാണ് വന്‍ ദുരന്തം ഒഴിവാക്കിയത്.
പാലായില്‍നിന്ന് ഫയര്‍ഫോഴ്‌സും എത്തിയിരുന്നു.