പാലക്കാട്: ബഹിരാകാശ ശാസ്ത്ര രംഗത്ത് രാജ്യത്തിന്റെ അഭിമാന പദ്ധതികളായ പി.എസ്.എല്‍.വി, ജി.എസ്.എല്‍.വി ഉപഗ്രഹങ്ങളുടെയും രോഹിണി സൗണ്ടിങ് റോക്കറ്റുകളുടേയും നിര്‍മാണ പങ്കാളിയായ ശാസ്ത്രജ്ഞനാണ് ജില്ലാ കലക്ടറായി ചുമതലയേറുന്ന ഡോ. പി. സുരേഷ് ബാബു. കൊല്ലം ടി.കെ.എം. എന്‍ജിനിയറിങ് കോളജില്‍ നിന്നും എന്‍ജിനിയറിങ് ബിരുദവും ഇഗ്‌നോയില്‍ നിന്നും എം.ബി.എയും തിരുവനന്തപുരം ലോ അക്കാദമിയില്‍ നിന്നും എല്‍.എല്‍.ബിയും പൂര്‍ത്തിയാക്കിയ ഡോ. പി. സുരേഷ് ബാബു കേരള സര്‍വകലാശാലയില്‍ നിന്നും പി.എച്ച്.ഡിയും നേടി. 1985 മുതല്‍ 2005 വരെ ബംഗളൂരു ഐ.എസ്.ആര്‍.ഒ, തിരുവനന്തപുരം വിക്രം സാരാഭായ് സ്‌പേസ് സെന്റര്‍ എന്നിവിടങ്ങളില്‍ സേവനം അനുഷ്ഠിച്ചു.
ഒന്നാം റാങ്കോടെ വിജയിച്ച് ഡെപ്യുട്ടി കലക്ടറായി ജോലിയില്‍ പ്രവേശിച്ച അദ്ദേഹത്തിന് 2016ലാണ് ഐ.എ.എസ് ലഭിക്കുന്നത്. സംസ്ഥാന സഹകരണ ബാങ്ക് എം.ഡിയായാണ് ആദ്യ നിയമനം. 2017 മെയ് മുതല്‍ മാര്‍ക്കറ്റിങ് ഫെഡ് എം.ഡിയായി ജോലി ചെയ്ത് വരികയായിരുന്നു. തുടര്‍ന്നാണ് ജില്ലാ കലക്ടറായി ചുമതലയേറ്റത്. പത്തനംതിട്ട അടൂര്‍ സ്വദേശിയാണ്.
ഭാര്യ ഡോ. ഡെയ്‌സി കിരണ്‍ തിരുവനന്തപുരം കിംസ് ആശുപത്രിയിലെ നേത്രരോഗ വിദഗ്ധയാണ്. മകള്‍ ടീന സുരേഷ് തിരുവനന്തപുരം കോളജ് ഓഫ് എന്‍ജിനിയറിങിലെ എം.ടെക് വിദ്യാര്‍ഥിനിയാണ്.