കൊടിയത്തൂര്‍: കൊടിയത്തൂര്‍ പഞ്ചായത്തിലെ പുതിയോട്ടില്‍ കടവില്‍ അനധികൃതമായി മണല്‍ കടത്താനെത്തിയ തോണിയും ലോറിയും പിടികൂടി. വെള്ളിയാഴ്ച്ച പുലര്‍ച്ചെയാണ് സംഭവം.

മണല്‍ ശേഖരിച്ച കെ.ഡി.ആര്‍ 12-ാം നമ്പര്‍ തോണി പുതിയോട്ടില്‍ കടവിലെ തൂക്കുപാലത്തിന് താഴെയുള്ള പതാറില്‍ അടുപ്പിച്ച് ലോറിയില്‍ മണല്‍ കയറ്റുമ്പോള്‍ കൊടുവള്ളി സി.ഐയുടെ സ്‌പെഷ്യല്‍ സ്‌ക്വാഡ് അംഗങ്ങളാണ് തോണിയും ലോറിയും പിടികൂടിയത്. സ്‌പെഷ്യല്‍ സ്‌ക്വാഡിലെ എ.എസ്.ഐ വിനോദ്, ഹോം ഗാര്‍ഡ് ഷൈജു എന്നിവര്‍ ചേര്‍ന്നാണ് മണല്‍കടത്ത് പിടികൂടിയത്. ലോറി ഡ്രൈവറും മണല്‍ തൊഴിലാളികളും പുഴയില്‍ ചാടി നീന്തി രക്ഷപ്പെട്ടു. തുടര്‍ന്ന് പഞ്ചായത്ത് പ്രസിഡന്റ് സി.ടി.സി അബ്ദുള്ള, മെംബര്‍ കബീര്‍ കണിയാത്ത്, മുക്കം പൊലിസ്, പുഴ സംരക്ഷണ സമിതി പ്രവര്‍ത്തകര്‍ സ്ഥലത്തെത്തി. മണല്‍ കയറ്റുകയായിരുന്ന കെ.എല്‍. ഏഴ് .എ .ഇസഡ് 5502 നമ്പര്‍ ലോറി മുക്കം പൊലിസും, മണല്‍ കയറ്റിയ തോണി അരീക്കോട് പൊലിസും കസ്റ്റഡിയിലെടുത്തു.