ആഗ്ര: താജ്മഹല്‍ നിന്നിടത്ത് ക്ഷേത്രമുണ്ടായിട്ടില്ലെന്നും അതൊരു ശവകൂടീരമാണെന്നും ആര്‍ക്കിയോളജിക്കല്‍ സര്‍വേ ഓഫ് ഇന്ത്യ. കോടതിയില്‍ സമര്‍പ്പിച്ച വിശദീകരണത്തിലാണ് ആര്‍ക്കിയോളജിക്കല്‍ വിഭാഗം ഇക്കാര്യം വ്യക്തമാക്കിയത്. നേരത്തെ കേന്ദ്ര സാംസ്‌കാരിക മന്ത്രാലയം ലോക്‌സഭയില്‍ താജ്മഹല്‍ നിലനില്‍ക്കുന്നിടത്ത് ക്ഷേത്രമുണ്ടായിരുന്നില്ലെന്ന് പറഞ്ഞിരുന്നു.
താജ്മഹല്‍ നിന്നിടത്ത് ശിവക്ഷേത്രമായിരുന്നെന്ന് ചൂണ്ടിക്കാണിച്ച് ആറു അഭിഭാഷകരാണ് ആഗ്ര ജില്ലാ കോടതിയില്‍ ഹരജി ഫയല്‍ ചെയ്തത്. ഹിന്ദു വിശ്വാസികള്‍ ഇവിടെ പ്രാര്‍ഥനയ്ക്ക് അനുവാദം നല്‍കണമെന്നും ഇവര്‍ ആവശ്യപ്പെട്ടിരുന്നു. താജ്മഹലിന് ഒരു പ്രത്യേക മതവുമായി ബന്ധമില്ലെന്നും അതിനാല്‍ പ്രാര്‍ഥന പോലുള്ള കാര്യങ്ങള്‍ക്ക് അനുവദിക്കാന്‍ പാടില്ലെന്നുമാണ് ആര്‍ക്കിയോളജിക്കല്‍ വിഭാഗത്തിന്റെ നിലപാട്.