തിരുവനന്തപുരം: സംസ്ഥാന സര്‍ക്കാര്‍ കൊട്ടിഘോഷിച്ച് കൊണ്ടുവന്ന 'ഓണത്തിനൊരുമുറം പച്ചക്കറി' പദ്ധതി പാളി. ഓണത്തിനു ദിവസങ്ങള്‍ മാത്രമാണ് ഇനി ബാക്കിയുള്ളത്. എന്നാല്‍ പദ്ധതി ആസൂത്രണത്തിന്റെ പിഴവുകാരണം ഓണത്തിന് അരമുറം പച്ചക്കറി പോലും വിതരണം ചെയ്യാനാകാത്ത സാഹചര്യമാണു നിലവില്‍. രജിസ്റ്റര്‍ ചെയ്ത ഭൂരിഭാഗം പേര്‍ക്കും ഗ്രോബാഗ് പോലും ലഭിച്ചിട്ടില്ലെന്നും ആക്ഷേപമുണ്ട്. ഇതിനെതിരേ പ്രതിഷേധം ശക്തമായിട്ടുണ്ട്.
ഓണത്തിന് സംസ്ഥാനത്ത് പച്ചക്കറി സുലഭമാക്കാനായാണ് 'ഓണത്തിനൊരുമുറം പച്ചക്കറി' എന്ന പദ്ധതി സര്‍ക്കാര്‍ വിഭാവനം ചെയ്തത്. സംസ്ഥാനത്തെ 63 ലക്ഷം കുടുംബങ്ങളെ ഉള്‍പ്പെടുത്തി ജനകീയമായി കൃഷി പ്രോത്സാഹിപ്പിക്കാനായിരുന്നു ലക്ഷ്യം. സ്വന്തമായി കൃഷി ചെയ്ത പച്ചക്കറിയാല്‍ ഓണവിഭവങ്ങളൊരുക്കാനുള്ള പദ്ധതി ഒന്നരമാസം മുന്‍പെ മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യുകയും ചെയ്തു. രജിസ്റ്റര്‍ ചെയ്യുന്ന ഓരോ കുടുബങ്ങള്‍ക്കും 2,000 രൂപ വില വരുന്ന 20 ഗ്രോബാഗുകള്‍ 500 രൂപ നിരക്കില്‍ വിതരണം നടത്തുമെന്നായിരുന്നു പ്രഖ്യാപനം. ഉദ്ഘാടനത്തിന്റെ ഒരാഴ്ചയ്ക്കുള്ളില്‍ ഗ്രോബാഗുകള്‍ നല്‍കുമെന്ന് സര്‍ക്കാര്‍ അറിയിച്ചു. എന്നാല്‍ രജിസ്റ്റര്‍ ചെയ്ത ഭൂരിഭാഗം പേര്‍ക്കും ഇതുവരെ ഗ്രോബാഗുകള്‍ ലഭിച്ചിട്ടില്ല. ഇനി ലഭിച്ചാലും ഒരാഴ്ചയ്ക്കുള്ളില്‍ എങ്ങനെ പച്ചക്കറി ഉല്‍പാദിപ്പിക്കാനാണെന്നാണ് ഇവര്‍ ചോദിക്കുന്നത്.
ആസൂത്രണത്തിലെ പാളിച്ചയാണു പദ്ധതി പരാജയപ്പെടാന്‍ കാരണം. യഥാസമയം അപേക്ഷിച്ചവര്‍ക്ക് ഗ്രോബാഗുകള്‍ നല്‍കാന്‍ പോലും ഉദ്യോഗസ്ഥര്‍ക്കു കഴിഞ്ഞില്ല. സെക്രട്ടേറിയറ്റില്‍ ഉദ്ഘാടനത്തിനു നട്ട പച്ചക്കറികളുടെ കാര്യമൊഴിച്ചാല്‍ മിക്കയിടത്തും പദ്ധതി പരാജയമാണ്. ഹരിതകേരള മിഷനുമായി ബന്ധപ്പെടുത്തി കുടുംബശ്രീകള്‍, വീട്ടമ്മമാര്‍, വിദ്യാര്‍ഥികള്‍, തൊഴിലുറപ്പു തൊഴിലാളികള്‍, പച്ചക്കറി ക്ലസ്റ്ററുകള്‍, ഉദ്യോഗസ്ഥര്‍, വിവിധ സ്ഥാപനങ്ങള്‍ തുടങ്ങി എല്ലാവിഭാഗങ്ങളുടെയും സഹകരണത്തോടെ പദ്ധതി യാഥാര്‍ഥ്യമാക്കാനായിരുന്ന സര്‍ക്കാര്‍ ഉദ്യമം. 63 ലക്ഷം വിത്ത്പായ്ക്കറ്റുകള്‍, 45 ലക്ഷം പച്ചക്കറി തൈകള്‍, ഒരുലക്ഷത്തിലേറെ ഗ്രോബാഗുകള്‍ എന്നിവയാണു വിതരണം ചെയ്യാന്‍ ഉദ്ദേശിച്ചിരുന്നത്.
ഓരോ കുടുംബവും കുറഞ്ഞത് അഞ്ചിനം പച്ചക്കറിയെങ്കിലും സ്വന്തമായി ഉല്‍പാദിപ്പിച്ച് ഓണസദ്യയ്ക്കുള്ള വിഭവം തയാറാക്കണമെന്നതായിരുന്ന ഉദ്ദേശ്യം. ഇതു സ്ഥിരസംവിധാനമാക്കി വിഷരഹിത ഭക്ഷണം ശീലമാക്കാനും പദ്ധതി വിഭാവനം ചെയ്തിരുന്നു. പച്ചക്കറിയില്‍ സ്വയംപര്യാപ്ത സംസ്ഥാനമെന്ന സര്‍ക്കാരിന്റെ പ്രഖ്യാപിതലക്ഷ്യമാണ് ഉദ്യോഗസ്ഥമാരുടെ അലംഭാവംമൂലം അട്ടിമറിക്കപ്പെടുന്നത്.