തിരൂരങ്ങാടി: വാഹനങ്ങള്‍ വണ്‍വേ ലംഘിക്കുന്നതിനാല്‍ ചെമ്മാട് ടൗണില്‍ ഗതാഗതക്കുരുക്ക് രൂക്ഷമായി. കൊടിഞ്ഞി റോഡ്, ബ്ലോക്ക് റോഡ് എന്നിവിടങ്ങളിലാണ് വാഹനങ്ങള്‍ വണ്‍വേ ലംഘിക്കുന്നത്. ചെമ്മാട് ബൈപാസ്, കൊടിഞ്ഞി റോഡ് എന്നിവിടങ്ങളില്‍ നിന്നുമുള്ള വാഹങ്ങള്‍ക്ക് കൊടിഞ്ഞിറോഡിലൂടെ ടൗണിലേക്ക് പ്രവേശനാനുമതിയുണ്ടെങ്കിലും കൊടിഞ്ഞി ഭാഗത്തേക്കുള്ള വാഹങ്ങള്‍ ബ്ലോക്ക് റോഡ് വഴിയാണ് തിരിച്ചുവിടുന്നത്.
താലൂക്കാശുപത്രിയിലേക്കുള്ള വാഹനങ്ങള്‍ക്ക് മാത്രമേ കൊടിഞ്ഞിറോഡിലൂടെ പ്രവേശനാനുമതിയുള്ളൂ. എന്നാല്‍ കൊടിഞ്ഞിഭാഗത്തേക്കുള്ള മിക്ക സ്വകാര്യവാഹനങ്ങളും കൊടിഞ്ഞിറോഡ് വഴിയാണിപ്പോള്‍ കടന്നുപോകുന്നത്. ഇക്കാരണത്താല്‍ താലൂക്കാശുപത്രിയിലേക്കുള്ള പ്രധാന റോഡായ ഇവിടെ ദീര്‍ഘനേരം ഗതാഗതക്കുരുക്ക് പതിവാണ്. ചെമ്മാട് ടൗണിലേക്ക് ബൈപാസില്‍നിന്നു ബ്ലോക്ക്‌റോഡ് വഴിപ്രവേശനം നിരോധിച്ചിട്ടുണ്ട്. എന്നാല്‍ വാഹനങ്ങള്‍ ട്രാഫിക് നിയമം തെറ്റിക്കുകയാണ്. ബലിപെരുന്നാള്‍, ഓണം വിപണി സജീവമായതോടെ ഗതാഗതക്കുരുക്കിനാല്‍ വീര്‍പ്പുമുട്ടുകയാണ് ചെമ്മാട് ടൗണ്‍. ബ്ലോക്ക് റോഡ് ജങ്ഷനിലെ വ്യാപാരസ്ഥാപനങ്ങളിലേക്ക് വരുന്ന വാഹനങ്ങള്‍ റോഡരികില്‍ പാര്‍ക്ക് ചെയ്യുന്നതും ഗതാഗതക്കുരുക്കിന് ആക്കംകൂട്ടുന്നുണ്ട്.