കോഴിക്കോട്: ടി.എ റസാഖ് ഉറവ വറ്റാത്ത സൗഹൃദത്തിന്റെ നീര്‍ച്ചാലായിരുന്നുവെന്ന് തിരക്കഥാകൃത്ത് ജോണ്‍ പോള്‍. ടി.എ റസാഖ് സൗഹൃദ വേദി സംഘടിപ്പിച്ച 'സിനിമയ്ക്കപ്പുറം റസാഖ് ' എന്ന ടി.എ റസാഖ് അനുസ്മരണം ഉദ്ഘാടനം ചെയ്യുകയായിരുന്നു അദ്ദേഹം. ജീവിത പ്രതിസന്ധികളെ നര്‍മത്തില്‍ ചാലിച്ച് പകുത്തു തന്നാണ് അദ്ദേഹം നമ്മോട് വിട പറഞ്ഞത്. സിനിമയില്‍ ചുറ്റുമുള്ള സമൂഹത്തിന്റെ ഉത്കണ്ഠകള്‍ പ്രകടമാക്കാന്‍ റസാഖിലെ മനുഷ്യസ്‌നേഹിക്ക് സാധിച്ചെന്നും കാപട്യമില്ലാത്ത പച്ചമനുഷ്യനായിരുന്നു റസാഖെന്നും ജോണ്‍ പോള്‍ അനുസ്മരിച്ചു. 
കെ.പി സുധീര അധ്യക്ഷയായി. ഡോ. എം.കെ മുനീര്‍ എം.എല്‍.എ, എ. പ്രദീപ്കുമാര്‍ എം.എല്‍.എ, പി.വി ഗംഗാധരന്‍, ചലചിത്രതാരം വിനീത്, ടി.പി ബാലന്‍, ഷാജൂണ്‍ കാര്യാല്‍, പി. ദാമോദരന്‍, ഹംസ കൈനിക്കര, പി. വി ജയരാജ്, പി. ഷാജഹാന്‍, ആശിഖ് ചെലവൂര്‍ സംസാരിച്ചു. ഡോ. പി.പി വേണുഗോപാല്‍ സ്വാഗതവും ടി. കൃഷ്ണകുമാര്‍ നന്ദിയും പറഞ്ഞു.