മുംബൈ: ഇന്ത്യന്‍ പ്രീമിയര്‍ ലീഗിന്റെ (ഐ.പി.എല്‍) സംപ്രേക്ഷണാവകാശം റെക്കോര്‍ഡ് തുകയ്ക്ക് സ്റ്റാര്‍ ഇന്ത്യ സ്വന്തമാക്കി. അഞ്ച് വര്‍ഷത്തേക്കുള്ള സംപ്രേഷണാവകാശം 16,347.50 കോടി രൂപയ്ക്കാണ് സ്റ്റാര്‍ ഇന്ത്യ നേടിയത്. ടെലിവിഷന്‍ സംപ്രേഷണത്തിന് പുറമെ ഡിജിറ്റല്‍ സംപ്രേഷണവും സ്റ്റാറിന് ലഭിച്ചു. 2018, 2022 കാലയളവിലെ സംപ്രേഷണാവകാശമാണ് ലേലത്തിലൂടെ നിര്‍ണയിച്ചത്. സോണിയുടെ പ്രതീക്ഷ തല്ലിക്കെടുത്തിയാണ് പണമൊഴുകുന്ന ലീഗിന്റെ സംപ്രേഷണ അവകാശം സ്റ്റാര്‍ ഗ്രൂപ്പ് പിടിച്ചെടുത്തത്. കഴിഞ്ഞ സീസണില്‍ 8200 കോടി കിട്ടിയ സ്ഥാനത്താണ് ഇരട്ടി മൂല്യത്തിന് ഇത്തവണത്തെ അവകാശം ബി.സി.സി.ഐ സ്റ്റാറിന് നല്‍കുന്നത്. നേരത്തെ സോണി പിക്‌ചേഴ്‌സ് 10 വര്‍ഷത്തേക്കായിരുന്നു കരാര്‍ സ്വന്തമാക്കിയത്.
പുതിയ ലേലമനുസരിച്ച് ഒരു ഐ.പി.എല്‍ മത്സരത്തിന്റെ സംപ്രേഷണ മൂല്യം 55 കോടി രൂപയാകും. നേരത്തെ മൂല്യം 15 കോടി രൂപയായിരുന്നു. ഐ.പി.എല്‍ വിതരണാവകാശം സ്വന്തമാക്കാന്‍ 24 കമ്പനികള്‍ ടെന്‍ഡര്‍ വിവരങ്ങള്‍ വാങ്ങിയിരുന്നെങ്കിലും 14 കമ്പനികള്‍ മാത്രമാണ് ലേലത്തില്‍ പങ്കെടുത്തത്.