വൈക്കം: വനിതാ ഫുട്‌ബോള്‍, ഹോക്കി എന്നിവയില്‍ സൗജന്യ കോച്ചിങ് ക്യാംപ് കുലശേഖരമംഗലം ഗവണ്‍മെന്റ് ഹയര്‍ സെക്കന്‍ഡറി സ്‌കൂളില്‍ ആരംഭിച്ചു. കോട്ടയം, കുലശേഖരമംഗലം എന്നിവിടങ്ങളിലെ വിദ്യാര്‍ഥികള്‍ക്കാണ് സൗജന്യ പരിശീലനം നടത്തുന്നത്.
ഇന്‍ഡ്യന്‍ ക്യാമ്പിലെ കളിക്കാരും ദേശീയ താരങ്ങളും ഈ ക്യാംപില്‍ പങ്കെടുക്കുന്നുണ്ട്. കോട്ടയം ബസേലിയോസ് കോളജ്, നാട്ടകം ഗവണ്‍മെന്റ് കോളജ്, കുലശേഖരമംഗലം ഗവണ്‍മെന്റ് ഹയര്‍സെക്കന്‍ഡറി സ്‌കൂള്‍, ഇരിഞ്ഞാലക്കുട കാര്‍മല്‍ കോളജ്, വൈക്കം സെന്റ് തെരേസാസ് ഗേള്‍സ് ഹയര്‍ സെക്കന്‍ഡറി സ്‌കൂള്‍ എന്നിവിടങ്ങളില്‍ നിന്നായി നാല്‍പത്തില്‍പരം കുട്ടികള്‍ ക്യാംപില്‍ പങ്കെടുക്കുന്നുണ്ട്.
രാവിലെ 8.30 മുതല്‍ വൈകിട്ട് അഞ്ചുവരെയാണ് പരിശീലനം. ഈ ക്യാംപില്‍ നിന്നുമാണ് സായിയുടെ വനിതാ ഫുട്‌ബോള്‍ ടീമിലേക്ക് കുട്ടികളെ തെരഞ്ഞെടുക്കുന്നത്. സായിയുടെ ഫുട്‌ബോള്‍ കോച്ചായ ജോമോന്‍ ജേക്കബ് ആണ് പരിശീലകന്‍. ക്യാംപ് പത്തിന് സമാപിക്കും. താല്‍പര്യമുള്ള കായിക താരങ്ങള്‍ക്ക് സൗജന്യ ക്യാംപില്‍ പങ്കെടുക്കാം.