ലാഹോര്‍: ലോക ഇലവനെതിരായ ഒന്നാം ടി20 പോരാട്ടത്തില്‍ പാകിസ്താന് 20 റണ്‍സ് വിജയം. ആദ്യം ബാറ്റ് ചെയ്ത പാകിസ്താന്‍ നിശ്ചിത 20 ഓവറില്‍ അഞ്ച് വിക്കറ്റ് നഷ്ടത്തില്‍ 197 റണ്‍സെന്ന മികച്ച സ്‌കോര്‍ പടുത്തുയര്‍ത്തിയപ്പോള്‍ ലോക ഇലവന്റെ പോരാട്ടം ഏഴ് വിക്കറ്റ് നഷ്ടത്തില്‍ 177 റണ്‍സില്‍ അവസാനിച്ചു. 29 റണ്‍സ് വീതമെടുത്ത നായകന്‍ ഡു പ്ലെസിസ്, ഡാരന്‍ സമ്മി എന്നിവരാണ് ലോക ഇലവനായി പൊരുതിയത്. പാക് നിരയില്‍ സൊഹൈല്‍ ഖാന്‍, റമ്മന്‍ റയീസ്, ഷദബ് ഖാന്‍ എന്നിവര്‍ രണ്ട് വീതം വിക്കറ്റുകള്‍ വീഴ്ത്തി. നേരത്തെ 52 പന്തില്‍ 86 റണ്‍സടിച്ച ബാബര്‍ അസമിന്റെ ബാറ്റിങാണ് പാകിസ്താന് മികച്ച സ്‌കോര്‍ സമ്മാനിച്ചത്. മൂന്ന് മത്സരങ്ങളടങ്ങിയ പരമ്പരയില്‍ പാകിസ്താന്‍ 1-0ത്തിന് മുന്നില്‍.